Apuntametus: in Casteddu sa primu editzioni de su "Festival di Buone Pratiche e Nuovi Stili"

(IlMinuto) – Casteddu, 12 de su mes''e gennàrgiu - "Dire – Fare – Sostenibile – Solidale – Buone Pratiche – Nuovi Stili": est custu su títulu de sa manifestada chi s'at a tenni in is aposentus de s'ex liceu artísticu de Casteddu de su 13 a su 15 de su mes''e gennàrgiu. Sa primu editzioni de s'eventu si movit ingíriu a diversus princípius: s'educatzioni a su rispàrmiu, is pràtigas de scàmbiu, s'agiudu càmbiu e su recúperu. In is aposentus de pratza Dettori, at essi possíbbili avisitai stand dedicaus a su scàmbiu de is gioghitus e de is líbburu usaus, e banchixeddus po pigai prodotus de artesanau fattus cun materialis de recúperu. Ma no scèti, in custus aposentus s'ant a tenni butegas po pipius e piocicus e proietzionis de filmaus a tema. S'intrada a sa manifestada - chi nascit de una bidea de s'assótziu Sardegna Leaving e de s'Assessorau a is Políticas Socialis de su Comunu de Casteddu - est a gratis e at a sighiri custus oràrius: su 13 e su 14 de su mes''e gennàrgiu s'obertura est previdia de is 15.00 a is 20.00, mentris su 15 de su mes''e gennàrgiu s'intrada at essi de is 10.00 a is 20.00.