Arribbat su dinai po sa bunífica de is ex minieras. Operàjus Rockwool: “Méritu de sa lota nostra”

(IlMinuto) - Casteddu, 27 de su mes''e gennàrgiu - A pustis de 14 mesis de presídiu e de 100 diris in su "Rockbus" s'oberrit unu spiraderu po is pagu prus de 60 traballadoris in cassa integratzioni de sa Rockwool de Igrèsias. Is operàjus iant a podi difatis essi pigaus cantu primu in is òberas de bunífica de is ex minieras, traballus finatziaus de sa Regioni Sardigna, chi at donau duus millioni de eurus scéti po su Surcis Igresienti. De sa nova ant chistionau ariseru a mangianu is traballadoris e is rapresentantis sindacalis in d'un'assembrea in sa pratza a fac''e sa miniera de Campo Pisano, aundi de prus de tres mesis est parchegiau su "Rockbus" . "Siat craru - ant cummentau is traballadoris in su diàriu online insoru - chi fintzas a candu is traballadoris Rockwool no ant a torrai traballai sa lota nostra at a andai ainnantis. No si fadeus illusionis ma seus sèmpiri prus fiduciosus, a sa faci de is bremis chi si pigànt po culu, a sa faci de chini bidiat su camminu de is buníficas comenti una cosa de foras de conca. Arremaciaus, nesciuna illusioni ma si is buníficas ant a torrai a cumentzai custu est méritu puru de sa lota nostra".