Rispàrmiu de s'energia: in Casteddu torrat "M'illumino di meno"

(IlMinuto) – Casteddu, 18 mes''e fiàrgiu - Casteddu torrat a imprassai "M'illumino di meno", sa campagna de s'aràdiu po su rispàrmiu de s'energia promòvia de Caterpillar, su programma de s'aràdiu nomenau meda e chi si podit intendi a Radio2. S'apuntamentu cun s'energia pulia est po su 18 de su mes''e fiàrgiu a is 15.00. "Sardegna Ricerche", addirendu a sa causa, atressu de su Cluster "Energie Rinnovabili", at decidiu de participai a s'eventu promovendi e aprontendi unu momentu recreativu, un'aperienti musicali senz''e costu de energia, gratzias a s'impitu de fontis de energia rennovàbilis e "chi proponint un'àteru tipu de energia". S'energia elétrica necessària po s'impiantu po is sonus at essi fornia de is pilas carrigadas de is pannellus fotovoltaicus assentaus in sa sedi de Macchiareddu e s'impiantu de illuminazioni at essi alimentau ingunis etotu impitendi bicicretas ispecialis chi, modificadas po a cosa, ant a fai energia gratzias a is pedaladas de is participantis. Su púbblicu at essi difatis parti ativa de s'eventu. Dognunu s'at a podi iscriri a sa gara "produzione partecipata e pedalata di energia" fadendi scuadras de cuatru personis. A sa fini de su merì dógnia ciclista chi fait parti de sa scuadra chi at produsiu prus energia at a benni premiau cun d'unu carrigadori solari po su telèfunu. S'eventu at a finiri candu s'energia de is pilas at essi spaciada est nai puru: candu sa genti no at a tenni prus gana de pedalai.

Sa manifestada est aprontada cun s'agiudu de diversus patners: sa Facoltadi e su Dipartimentu de Architetura e su Dipartimentu de Ingigneria Eletrica e Eletronica de s'Universidadi de is istudius de Casteddu, s'Assótziu Sustainable Happiness, s'Assótziu Quit e sa Ciclofucina.