Incidenti in sa Saras: Pulvirenti est mortu. Sinistra critica sarda: "Nisciuna preneta, ma omicidiu"

(IlMinuto) – Casteddu, 12 de su mes''e arbili - Pierpaolo Pulvirenti est mortu. S'ómini, 23 annus, si nd'est andau a is cincu 'e chitzi in s'ispidali Santissima Trinità de Casteddu. Ariseru a merì a is 19.00 furiat stetiu carraxau impari cun su cullega Gabriele Serrano, de 23 annus, de unu gétidu de H2S - candu furiat traballendi a sa manutentzioni de s'impiantu Dea a sa Saras de Sarròccu. Impiantu chi - a cantu narat is sindacaus - is traballadoris iant essi depiu agatai interamenti bonificau: senz''e nisciuna arremusulla de gas. In s'ispidali ddoi est puru unu terzu operàju, chi s'est truncau una camba circhendi de agiudai a is duus cullegas de s'aziendha siciliana Star Service. Asuba de s'acontéssia fueddat cun d-una nota Sinistra Critica Sarda. "Acanta de is duus annus de sa morti de Daniele Melis, de Bruno Muntoni e de Luigi Solinas – si ligit in d-una nota - depeus impitai is mantessi fueddus de tandhu. Custa morti no est filla de una preneta tràgica, ma est un'omicidiu, est su frutu de unu sistema chi fait de sa seguresa una variàbili chi dipendit de is interessus e de is tempus de su capitali".