Equitalia contr'a totus (o casi)
(Chistioni e Opinionis) - Casteddu, 12 de su mes' e maju - "Sa causa de unu sistema de coberantza ingiustu e iniqu chi fatuvatu arribbat a sa scicuta de is màchinas, a s'imbargu de is creditus e de is immòbilis de is contribuentis". Aici is indipendentistas de Irs descrirint a Equitalia: sa sociedadi po atzionis, totu a capitali púbblicu (su 51 po centu est de s'Agentzia de is Intradas e po su 49 po centu est de s'Inps) incarrigada de su traballu de coberantza de is pagamentas in totus is regionis, bogada sa Sicilia.
Su movimentu de Gavinu Sale podit essi cunsiderau s'animigu púbblicu númeru unu de Equitalia in Sardigna: de annus meda Irs aprontat mobilitadas contr'a custa sociedadi po atzionis operativa de su 2006. Tra is úrtimas mobilitadas cussa de sa metadi de su mes'e arbili chi at biu protagonista una culunna de màchinas longa meda cumentzada de Tàtari e po arribbai fintzas a Casteddu, e sa lítera mandada a is síndhigus de totu sa Sardigna cun su cumbidu de arretirai sa dèlega a sa Spa po sa coberantza de is pagamentas. Contr'a Equitalia puru is butegaius e is artesanus chi oi manifestant in Casteddu. No est accabbada innoi: in is úrtimas diris puru su presidenti de sa Regioni puntat su didu contr'a sa sociedadi de coberantza. "Equitalia - narat Ugu Cappellacci in d-unu comunicau - si fait intèrpreti de unu modellu fiscali […] de aggràbiu chi arriscat de distruiri sa produtzioni de is impresas nostras giai fertas in modu grai de sa crisi económica internatzionali". Sa nota de imprenta de sa Giunta regionali no cumbincit perou a su Pd sardu. "Seus a buca oberta - narat su segretàriu regionali Sirbiu Lai - de sa posizioni de su presidenti de sa Regioni. Ddoi funt is cunditzionis - precisat Lai - po andai addia de su simpli comunicau de imprenta contr'a Equitalia. Sa Giunta regionali podit pediri su stadu de crisi, sa pròroga fiscali e fai cussu chi permitit sa legislatzioni in vigori. No si podit rinviai sa chistioni a una mesa de su federalismu fiscali".
E bosàterus ita ndi pensais?
Progetu realizadu cun sa partetzipatzione de sa Regione Autònoma de Sardigna – L.R 26/97 subra sa limba e sa cultura sarda