Iscola: 500 traballadoris de sa netesa funt a arriscu lissentziamentu. Cras isciòpiru Cgil in Casteddu

(IlMinuto) – Casteddu, 18 de su mes'e maju - Arriscant su postu de traballu is prus de 500 traballadoris de is aziendhas privadas chi tenint in gestioni sa netesa in is iscolas de totu sa Sardigna. Est cantu denunciat cun d-una nota de imprenta sa Filcams Cgil. De custu tema s'at a fueddai oi in Roma in d-un'atóbiu avisau in sa sedi de su Ministeru de su Traballu. "Seus apensamentaus - acrarat la segretària regionali de Filcams Simona Fanzesco - poita is solutzionis circadas fintzas a immoi de su Ministeru de s'Universidadi e de sa Circa no donant seguresa a is traballadoris e nemmancu a su serbítziu. In ausentzia de arrespustas seguras de sa mesa de Roma, is istitutzionis regionalis e provintzialis s'ant a depi acollai s'istrobbu sociali e impegnendusì a agatai un'àteru traballu a custus traballadoris". In su trastempus est stetiu giai avisau un'isciòpiru po cras de una diri intrea. Is traballadoris s'ant a presentai a fac'e sa diretzioni iscolastica de Casteddu, in bia Regina Margherita, a is 10.00.