Relata Crenos 2011: sa Sardigna sighit a afundai

(IlMinuto) – Casteddu, 27 de su mes'e maju - Sighit a torrai agoa sa Sardigna. Sa XVIII Relata Crenos, presentada custu mangianu in s'àula magna de sa Facoltadi de Ingigneria in Casteddu, descririt - comenti s'editzioni passada - unu cuadru malu meda de is úrtimus annus de s'ecunumia sarda. In su 2009 su Pil de sa Sardigna est abasciau de su 3,9%. In su decenniu 1998-2008 su rédditu de is sardus, a personi, est cabau de su 10 po centu: passendu de s'89 a su 79 po centu de média de s'Europa. Is cusseguéntzias po sa vida de is personis funt legias meda, poita puru "is consumus de is famílias in baloris a personi - si ligit in d-una nota de imprenta - funt torraus comenti furiant in su 1999 cun d-un'irminorigamentu in is úrtimus cinc'annus de su 0,8 po centu a s'annu". In sa XVIII editzioni de sa Ralata Crenos - de pagu prus de 20 annus filla de su traballu fattu impari a is Universidadis de Casteddu e de Tàtari - ddoi est unu capítulu chi fueddat de is costus de sa política e de sa burocratzia in Sardigna, de custu eus a chistionai cras cun d-un'artículu de profundamentu.