Universidadi de Casteddu: de su senau académicu pagus cuncessionis a chini no est in cursu cun is esàmini i est in "decadessimentu". Delusioni de Uxs

(IlMinuto) - Casteddu, 24 de su mes'e maju - Prus apellus po is esàminis, simplificatzionis de is tesis e cuncessioni de una dilata a is istudiantis chi in su mes'e paschixèdda ant a tenni ancora pagus esàminis de donai po si podi laureai.  Custas funt scéti calencuna de is pagus cuncessionis chi s'Universidadi de Casteddu at a fai a is istudiantis chi no funt in cursu cun is esàmini e funt in "decadessimentu". Dd'at decidiu su Senau académicu de s'Ateneu casteddaiu in sa sétziada de su 17 de su mes'e maju. "Eus subrastimau su bonusensu de is senadoris. No eus otentu meda, ma no si podiat fai de prus". Aici su grupu de is istudiantis Uxs cummentat sa sétziada. Assembra chi s'est serrada cun sa renúntzia de parti de Uxs de contraiai a su documentu - scritu cun su Cumitau de is istudiantis - chi proponiat una fibera de cuncessionis mannas a chini no est in cursu cun is esàminis i est in "decadessimentu", a cantu bolit unu decretu de su Retori aprovau in su mes'e maju de su 2010. "Eus circau - si ligit in d-una nota fatta connosci de Uxs - de fai cumprendi a is senadoris ca is istudiantis chi ant firmau su documentu funt personis chi tenit totu s'interessu de si laureai, e chi ant fincau tempus e dinai po sa carriera insoru, personis chi si funt fadendi a arrogus po donai prus esàminis possíbbilis in pagu tempus […]. Funt sighias una fiberas de relatas totugantu contràrias a is propostas nostras, po custu no eus insistiu po ponni a is votus su documentu: no iaus otentu nemmancu cussu pagheddu chi ant consillau is Presidis e su Retori".