Ambienti: in Terraba su segundhu Pincnic de sa "decrescita"

(IlMinuto) – Casteddu, 3 de su mes'e làmpadas - "Sa tramuda cumentzat cun d-una bella ciaciarrada papendi" Est cun custa cunvintzioni chi s'assótziu Rizoma participat a sa segundha editzioni de su picnic de sa "decrescita". S'apuntamentu est po domínigu 5 de su mes'e làmpadas a is 12.00, in is giardinus de pratza Kennedy, in Terraba. "At essi una circustàntzia bella - acrarant is aprontadoris - po passai unu domínigu diversu asuta 'e su celu, bivi in modu diversu is logus púbblicus de sa bidda, papai cosa bella e sana, meditai asuba de temas importantis comenti sa "decrescita" e s'arrespetu de s'ambienti, e si fai una bella ciaciarrada cun personis amigas". Is "arregulas" de su Picnic de sa "decrescita" funt pagus e simplis. "Donniunu - si ligit in d-una nota de Rizoma - portat una specialidadi chi bolit fai tastai a is àterus, est mellus una cosa coxinada in modu sanu e fatta cun prodotus de su logu, unu pratu e una fruchita, (no depint essi de cussus de scavuai) e una manta po si setzi. Nudd'àteru".

Po ndi sciri de prus:
http://marraiafura.com/giornata-internazionale-del-pic-nic-per-la-decrescita/
http://picnic4degrowth.net/sites/default/files/ITALIANO%20info.pdf