A su "Carbonia Landscape Machine" su Prémiu europeu de su paisàgiu

(IlMinuto) – Casteddu, 20 de su mes'e làmpadas - Cun d-unu progetu chi tenit po títulu "Carbonia Landscape Machine" sa citadi de Crabònia at pigau su Prémiu europeu de su Paisàgiu 2010-2011. Crabònia at otentu custu importanti arreconoscimentu puru gràtzias a sa Facoltadi de Architetura de Castedddu, chi dd'at agiudada a lompi a s'arrisurtau. Po custu su 24 de su mes'e làmpadas, in s'àula magna de sa facoltadi casteddaia s'at a tenni una diri dedicada a sa presentada de su progetu. Po s'eventu, su Retori de s'Universidadi de Casteddu, Giovanni Melis, su síndhigu de Crabònia, Giuseppe Casti, su Diretori Regionali de su Paisàgiu e su Diretori de su Dipartimentu de Architetura ant a fai una cuferéntzia, innui - si ligit in d-una nota de imprenta - "su coru de s'esperiéntzia at essi argumentu de is relatas de su Presidi de sa Facoltadi, Antonello Sanna, de su Presidenti de sa Provìntzia de Crabònia-Igrèsias, Salvatore Cherchi, e de Carlo Olmo, maistu de Istória de s'Architetura in su Politénnicu de Torinu e Diretori de su "Giornale dell'Architettura", ribista chi at promòviu e sighiu su prémiu e sa candidadura de sa citadi sarda". Tra is participantis ddoi ant essi puru Alessandra Fassio, architetu de su Ministeru po is Benis e is Fainas culturalis e curadora de su prémiu po s'Itàlia, Giorgio Peghin, Stefano Asili e Carlo Aymerich de sa Facoltadi de Architetura de Casteddu, Giampaolo Porcedda e Enrico Potenza po su Comunu de Crabònia, Paola Atzeni, antropologa curadora de s'Ecomuseu de su craboni.