Ambienti. Gig e "Amici della Terra": "Is scàrrigus de Bassacutena in su mari de Palau"

(IlMinuto) – Casteddu, 1 de su mesi de austu - "Is scàrrigus "fortzis brutus" de Bassacutena si ghetant in su frumini Liscia e agoa dda acabant in mari, a s'artesa de s'arenàrgiu de sa Sciumara, in Palau. Ddu denutziant cun d-una nota su "Gruppo d'intervento giuridico" e is "Amici della Terra". "In pagus fueddus - si ligit in su giassu de su Gig - sa fratzioni de Bassacutena iat a scàrrigai in su frumini is àcuas pagu limpias, mentris su depuradori est frimu". Is duus assótzius ant inditau sa cosa a su Ministeru de s'Ambienti, a s'Arpas, a sa Provìntzia de Tarranóa-Tèmpiu e a àterus entis e autoridadis cumpetentis.