Avenimentus: a sa XI editzioni "Musica sulle Bocche"

(IlMinuto) – Casteddu, 29 de su mesi de austu - In Lùngoni torrat su Festival Internatzionali de Jazz "Musica sulle Bocche". S'avenimentu, cun s'apógiu de sa Regioni Autónoma de Sardìnnia, de sa Provìntzia de Terranòa e de sa Fondatzioni Bancu de Sardìnnia, est nàsciu puru gràtzias a s'agiudu de s'amministratzioni comunali, chi fintzas de sa primu bessida at cretiu in su progetu. De su primu a su 5 de su mesi de cabudanni, in sa bidda de sa Gallùra s'ant a podi ascurtai artistas intre is prus nomenaus de sa música internatzionali. Ocannu su festival musicali, fillu de una bidea de Enzo Favata, si ponit unu bistiri nou oberrendi s'enna a  diversus linguàgius musicalis. "Unu frúmini sonoru" - si ligit in d-una nota - "continuu de su mangianu fintzas a tradu mannu de noti, cun concertus in is arenàrgius, in is pratzas e in is crésias chi s'interverant a ispetàculus a s'orbescidroxu e a àterus chi s'ant a tenni in sa guarnitza de su faru de Capo Testa a scurugadroxu". Medas puru is avenimentus concomitantis, de is letzionis de jazz po pipius a sa mostra de fotografias chi tenit po ogetu is màginis de sa bidda chi dd'aghillit.

Po ndi sciri de prus: http://www.musicasullebocche.it/