Solidariedadi: in Sìnnia sa "Giornata della Salute in Pineta"

(IlMinuto) – Casteddu, 30 de su mesi de austu - "Arregala sa vida e as a arriciri una mata po sa vida!" Est custu su slogan chi at a acumpangiai a sa "Giornata della Salute in Pineta", sa manifestada in programma domínigu 18 de su mesi cabudanni in sa "Casermedda" de su pinedu de Sìnnia. De is 8.00 a is 13.00 "prus de 30 istitutzionis e assótzius de su logu - si ligit in d-una nota de imprenta - ant essi impinniadas a serbítziu de sa Comunidadii in mamentus de participatzioni, de atopu, de reflèscia e de spàssiu. at essi duncas una diri dedicada a sa saludi, a sa serenidadi, a s'ambienti, ma puru a sa música, a sa festa e prusatotu a sa solidariedadi". Sa cosa est promòvia de su Lions Club de Sìnnia cun s'apógiu de sa Provìntzia de Casteddu. Is aprontadoris cumbidant is participantis a fai unu, o prus de una de custas tres atzioneddas": donai su sànguni, donai is ullieras bécias o acotzai sa "Domu de ospedàgiu Lions" de Casteddu (istitutu chi aghillit is malàdius de tumori chi faint terapia in ambulatoriu) e sa circa asuba de su schirru de s'Asris. "A testimónia de s'arregalu de bosàterus - acrarant is aprontadoris - eis a arriciri una mata de muta o de olioni".