Presonis. Sdr: "Arriscu mannu de istrumadura po sa presonera gràida de duus gemellus"

(IlMinuto) – Casteddu, 14 de su mesi de cabudanni - Est sèmpiri prus grai sa saludi de V.D., sa presonera de 28 annus, mama de cuàturu pipius de 8, 6, 5 e 3 annus e gràida de duus gemellus. In su noti de mérculis de cida passada sa fémina, de natzionalidadi serba, est stétia arricoverada in s'ispidali de Santu Giuanni de Deus in Casteddu, po ameletzu de istrumadura. Una dexina de diri fait su magistrau de Latina ddi iat negau is arrestus domitziliaris, cunsiderendi su stadu de ingraidéntzia cumpatìbili cun sa presonia in su presoni de Buoncaminu. "Imoi - denuntziat Maria Grazia Caligaris, presidenti de s'assótziu 'Socialismo Diritti e Riforme' – sa fémina est a arriscu mannu de istrumadura". Sa graesa de sa cosa est cunfirmada de sa ginecologa chi tenit in cura a V.D.. "S'ingraidéntzia - si ligit in follu firmau de su datori - est a arriscu mannu po mori de s'úrtimu ameletzu de istrumadura": "Fueddus crarus chi - pretzisat sa presidenti de Sdr - no lassant dúbbius asuba de s'incompantibilidadis cun sa permanéntzia in presoni". Sa rapresentanti sotzialista pedit un'àtera borta a su magistrau unu provedimentu chi permitat a V.D. de "andai a is arrestus domitziliaris o in d-un'àtera istrutura aundi potzat puru torrai a imbratzai a is pipius suus".