Protzessu Portovesme srl: cras sa senténtzia. Sit in de protesta a faci de Tribunali de Casteddu

(IlMinuto) – Casteddu, 19 de su mesi de paschixèdda - Est po cras 20 de su mesi de paschixèdda, agoa de una fibera de atrassaduras, sa senténtzia de su protzessu a s'arresponsabili de su sistema gestioni ambientali de sa Portovesme srl e a s'arresponsabili de sa gestioni arrefudus de su mantessi stabilimentu. Personis acusadas de ai donau s'órdini de intenterrai in manera abusiva deximilla metrus cubus de arrefudus industrialis de s'azienda - 15.000 tunneladas de arrefudus toscus e noxilis - in is tretus de Setimu, Serramanna e asuta de s'arruga de s'ispidali Businco, in Casteddu. Po sa senténtzia su Cumitau "Carlofortini Preoccupati" at pròmoviu un'àtera borta unu sit in de protesta, chi s'at a sboddiai de is 9.30 a faci de s'intrada de su Tribunali, in pratza Repúbrica. "Su pópulu sardu - si ligit in d-una nota de imprenta - no podit e no depit abarrai frimu a faci de custu strupiu ambientali. Contra a is fràbicas de is belenus, po pediri su cumentzu de is buníficas, po mudai sa cosa in faina eco-sustenìbili cun s'insertamentu de tutus is traballadoris". Cras, si no ddoi at essi un'àteru pellongu, ddoi at essi sa senténtzia po su protzessu Portovesme srl.