Sardigna: 350milla personis bivint in poberesa. Lítera de Cgil, Cisl, Uil a Lombardo

(IlMinuto) – Casteddu, 21 de su mesi de paschixèdda - S'aprou de una lei regionali e de programa in diversus annus contra a sa poberesa in Sardigna. Est cantu pedit una lítera-apellu chi is segretàrius generalis de Cgil, Cisl e Uil Enzo Costa, Mario Medde e Francesca Ticca ant donau ariseru a sa presidenti de su Consillu regionali Claudia Lombardo. Is datus apitzus de s'ecunumia sarda allistaus in sa lítera funt sèmpiri prus grais: su 18,5 po centu de is famílias sardas (350milla personis) bivit in poberesa e funt 15milla is traballadoris chi pigant is amortitzadoris sotzialis. Su pil abasciat de s'1,4 po centu. "Sa chistioni sotziali - scrirint is tres sindacaus in sa lítera - est su primu apretu de s'Ísula e andat afrontada in totus is facis suas, a cumentzai de su traballu chi no ddoi est e de su disimpreu intre is giòvanus, ma puru de s'irminorigamentu de su rédditu de is famílias.