“No eus a permiti chi Abdou bengat portau in s’arrori de s’Opg”. Amanniat sa mobilitada po agiudai a su furesteri arrestau candu furiat fadendi sa pregadoria sua

(IlMinuto) – Casteddu, 17 de su mesi de gennàrgiu - Sighit s'impignu in difesa de is diritus de Abdou Lahat Diop. Ariseru s'acontéssia chentza conca ni peis chi at tocau a su furesteri senegalesu est stétia denuntziada a s'imprenta de Roberto Loddo, boxi de su Comitau sardu "Stop Ospedali Psichiatrici Giudiziari". "Abdou – at nau Loddo - est unu piciocu senegalesu de 30 annus, chi su 16 de su mesi de paschixèdda de su 2011 at decídiu de pregai. Primu in domu sua e agoa in públicu, in s'arruga chi s'agat intre Ilàrtzi e Abbasànta. Abdou est musulmanu e fait parti de unu bratzu de custa religioni chi si lamat Murid. Candu furiat preghendi est stétiu acostau de unu carabineri, apensamentau chi essit tentu abisóngiu de agiudu. Abdou at arrespustu ca nou. Boliat scéti sighiri a pregai comenti fait sèmpiri. Est a nai in d-una manera meda forti de intensidadi spirituali, chi raramenti podit essi frimada cun d-un'oferta de agiudu o de chistionu. Cun s'interventu de su marisciallu sa cosa est impeorada. S'atzioni de is fortzas de s'órdini at fatu acabai sa pregadoria de Abdou. Su segengalesu est stétiu intzaras arrestau po arrumpellamentu, angaria e amaletzu a públicu ufitziali. Apustis de duas diris s'est tentu su protzessu po "direttissima", cun sa pirítzia dimandada de su giugi de su Tribunali de Aristanis e agoa fata de unu piritu, chi in is arrematus suus at giudicau Abdou "socialmenti perigulosu". Imoi Abdou s'agatat in su presoni de Aristanis, in abetu de essi portau in s'Ispidali psichiàtricu giuditziàriu de Aversa. "Su Tribunali de Aristanis - at acrarau sa boxi - at determinau ca Abdou no est afatenti po unu protzessu giustu, ma est prus adatu a is gàbias e s'arrori de s'Ispidali psichiàtricu giuditziàriu, poita est stétiu nau, de unu piritu chi no ddu connosciàt e chi no tenit connoscéntzia de sa cultura sua, ca no est prus capassu de intèndiri e de bòliri. Su Comitau pedit imbecis chi a su tzitadiu de su Senegal siat assegurada sa possibilidadi de pigai parti a su protzessu e de si difendi de is acusas. Po custu est stétiu lamau s'abogau Dario Sarigu, chi at a sighiri s'acontéssia de Abdou cun is obietivus primus de impediri su trasferimentu de in s'Opg e de ddu fai bessiri de presoni. In pagus diris de mobilitada de su Comitau at fatu nasci unu grupu Facebook chi tenit giai 1800 iscritus e at imbiau una lítera a su Presidenti de sa Repúbbrica "Própriu Naolitano - at amentau Loddo - at definiu un'iferru e un'arrori is ispidalis psichiàtricus giuditziàrius". A sa cuferéntzia de imprenta in difesa de Abdou Lahat Diop ddoi furiat genti meda: assótzius, is consilleris regionalis Gianvalerio Sanna (Pd) e Claudia Zuncheddu (Indipendentistas) e is rapresentantis de sa comunidadi senegalesa in Sardigna. Apitzus de sa cosa at fueddau cun d-una nota puru a Manca pro s’Indipendentzia. "Sa manca indipendentista - si ligit in su comunicau - pedit ca Diop Abdou Lahat siat liberau debressi e denuntziat cun fortza custa faina coloniali agraviosa, in nòmini de s'acasàgiu, de s'integratzioni, de s'arrespetu e de sa cuncàmbia culturali, de sèmpiri bandera de natzioni nostra".