"Sa vida nostra est acapiada a is arraspustas de sa profesoressa Fornero". Apellu de is malàdius de ravivanentu a su Ministru de is Políticas Sotzialis

(IlMinuto) – Casteddu, 28 de su mesi de martzu - "Boleus bivi comenti cristianus, no podeus impresonai is familiaris nostrus a is bisóngius nostrus, duncas invocaus un'atopu cun su Ministru o a su postu suu, unu Viceministru o unu Sutasegretàriu". Est custu s'apellu chi Salvatore Usala, boxi de is malàdius de Sla, at fatu a su Ministru pedendu un'atóbiu apretosu po chistionai de sa mancada cumpartzidura de is 100 milionis de euru finatziaus po sa Sla e po esaminai s'"assachizamentu chi infuriat asuba de su finantziamentu". Diversus is puntus crítigus. Intre custus si pretzisat ca sa cumpartzidura de su dinai po regioni est stétia fata castiendi a sa populatzioni, una "cosa mala e assurda, chi at portau a donai 30.000 eurus a sa Lombardia e 10.000 eurus a sa Sardigna aundi - narat Usala - ddoi est un'incidéntzia manna" de sa maladia. Diversas is domandas puru. De importu mannu sa chi pedit de "donai continuidadi a su finantziamentu de is 100 milionis de eurus po sa Sla, tramudendi destinatzioni, est a nai insertendi totus is malàdius "tetraplegici" o cun patologias "degenerative progressive", cun tracheostomia in bentuladura assistia po totu sa diri o comentisiollat chi tenint abisóngiu de assistu vitali po is 24 oras". Chi no ant a essi arricius, is malàdius ant a andai in crica, su 17 de su mesi de arbili, in sa domu de su Ministeru de is Políticas Sotzialis in bia Venetu 156 in Roma e ingunis ant a abarrai in pichetu fissu. "Eus a benni - pretzisat sa nota de imprenta - cun is màchinas chi si tenit in vida, cun ambulàntzias e médius ispecialis, prontus a totu, puru a morri, poita sa morti est sèmpiri pronta, prusatotu candu besseus de sa domu amparada nostra".