Delegatzioni istudiantis sardus in Bielorussia po amanniai is cuntatus sotzialis e culturalis intre is duus pópulu

(IlMinuto) – Casteddu, 4 de su mesi de arbili - De su 9 de su mesi de arbili una delegatzioni de 12 istudiantis de is iscolas superioris de sa provìntzia de Casteddu at essi presenti in Bielorussia. Is piciocus ant a andai in Minsk e ant a biri su parlamentu bielorussu e is printzipalis Universidadis de su logu, ant a pigai parti a seminàrius e cunvegnus e ant a atopai cun is rapresentantis de sa crésia ortodossa. Est custa sa terza esperiéntzia bielorussa, a pustis de sa de su 2008 e sa de su 2010, chi sa presidentzia provintziali donat a is piciocus sardus. Ocannu sa delegatzioni, chi at essi ghiada de su cónsulu bielorussu de s'ísula, previdit chi ddoi siant istudiantis universitarius puru. "Seus sighendi a acotzai custa proposta - pretzisat su presidenti de sa Provìntzia Roberto Pili - chi favoressit e afortiat is raportus intre sa Sardigna e sa Bielorussia. In manera particulari boleus ponni is basis po amanniai e allargai is cuntatus sotzialis e culturalis po fai sighiri is raportus intre is duus pópulus chi de diversu tempus funt acapiaus de un'amigàntzia manna nàscia cun su progetu Chernobyl".