"Rossella Urru Líbera". In Cuartu una "fiaccolata" a ses mesis de su ratu

(IlMinuto) – Casteddu, 18 de su mesi de arbili - Cuartu Sant'Aleni no si ndi scarescit de Rossella Urru. Cenàbara chi benit, a pagu prus de ses mesis de su ratu - acontéssiu su 22 de su mesi de ledàminis - de s'agiudanti sarda in su campu disterraus Saharawi in Algeria, in sa terza tzitadi de sa Sardigna s'at a sboddiai una "fiaccolata" po pediri su liberamentu de sa fémina e de is duus volonteris ispagnolus. S'atopu - aprontau de sa setzioni cuartesa de sa Fidapa cun s'apógiu de su Comunu - est po is 19.00 in pratza Sant'Aleni, de innoia a is 20.00 at a tucai sa "fiaccolata" po Rossella, chi at a atravessai is arrugas prus importantis de sa tzitadi po torrai agoa in pratza Sant'Aleni.