"Superai is apómpius a su cumprimentu de is caminus po is bicicretas in tzitadi". In Molentargius su cunvegnu de "Città Ciclabile"

(IlMinuto) – Casteddu, 2 de su mesi de arbili - S'est tentu gióbia passau, in s'edifitziu Sabis Sceberaus de su Parcu de Molentargius, su cunvegnu aprontau de "Città Ciclabile" onlus chi teniat comenti títulu "Su sistema de 'ciclovie' intre Molentargius Puetu e s'Area Metropolitana de Casteddu". Ant pigau parti a is traballus s'assessori comunali a is Trasportus Mauro Coni, su presidenti de sa commissioni trasportus de sa provìntzia Luca Mereu, e, po sa Federatzioni Italiana Amigus de sa Bicicreta, Giulietta Pagliaccio. Presentis puru is rapresentantis de is comunus de Cuartu, Cuartuciu, Ceraxus e Pauli. In s'atopu s'est postu in ispicu su netzessitu de serrai sa fasi progetuali de is pistas po is bicicretas po passai a sa fasi de ddas fai. Sa firma asuba de s'acórdiu de programa, chi previdit su finantziamentu de 5,8 milionis de eurus a is comunus de s'area manna de Casteddu de s'Assessorau regionali a sa Programatzioni, iat a depi diventai cuncreta intru 15 diris. In is progetus , chi interessant a totus is comunus de s'area casteddaia, est prevìdia, comenti si ligit in d-una nota de imprenta "sa 'ciclabilità' aintru, e sa de collegamentu intre is comunus etotu, e intre is comunus e Molentargius". In is traballus est stétiu pretzisau puru s'abisóngiu chi is aministratzionis comunalis s'impignint cun prus balentia po superai is apómpius a su cumprimentu de is caminus po is bicicretas"