"Una batalla po s'amparu de su territóriu nostru". Su Comitau "No a su Progetu Lianora" pedit unu consillu comunali istraordinàriu

(IlMinuto) – Casteddu, 24 de su mesi de arbili – Agoa de s'assembrea de su 21 de su mesi de arbili passau su Cumitau cívicu "No a su Progetu Lianora" espressat totu sa satisfatzioni sua po sa preséntzia e s'apentu de is tzitadinus de Arborea a sa chistioni de su Progetu Lianora. S'assembrea, ocasioni de cunfrontu públicu e de profundamentu apitzus de su tema, at afestau su determinu de sa Giunta Regionali de sutapòniri a avaloramentu de Efetu ambientali su Progetu bófiu de is Moratti. Is membrus de su comitau funt cumpraxus puru de sa preséntzia de su Síndigu, chi in rapresentantzia de s'aministratzioni comunali s'est declarau fasiu a ascurtai is istàntzias presentadas de is tzitadinus. Epuru - pretzisat una nota de imprenta firmada de su Comitau - "depeus [...] pretzisai comenti su Síndigu no apat espressau unu pentzu frimu ma si siat declarau un'àtera borta ni favoràbili ni contràriu' a su Progetu Lianora". Su Comitau pedit, difatis, chi s'aministratzioni comunali tengat unu pentzu craru in matéria. "Pedeus - sighit sa nota de imprenta - chi bengat avisau luegu unu Consillu comunali istraordinàriu obertu a sa genti de sa bidda biu s'importu de sa chistioni". Su Comitau "No a su Progetu Lianora" pedit chi in s'odg de su Consillu comunali siant insertaus duus puntus fundamentalis: sa votatzioni chi permitat a is membrus de su consillu de espressai unu parri favoràbili o contràriu a su progetu de pertusamentu in su territóriu, e cussa chi ddis dongat sa possibilidadi de fai giai de primu monitoragius ambientalis in su territóriu interessau de s'area de pertusamentu. "Custa dimanda - pretzisat su comitau - at essi portada in is diris chi benint a s'atentzioni puru de is Síndigus de is comunus lacanantis e de s'Unioni de is Comunus de su terrabesu e de sa provìntzia de Aristanis". "Eus otentu un'importanti arrisurtau, ma su Progetu Lianora no est stétiu frimau".