"Una Cara unu Nòmini", unu cunvegnu po sa campagna chi promovit su propassamentu de is Opg

(IlMinuto) – Casteddu, 17 de su mesi de arbili - "Una Cara unu Nòmini". Est custu su títulu de sa campagna incarrerada de su Comitau Stop Opg po afiancai su propassamentu beru de is Ispidalis psichiàtricus giuditziàrius, promovendi unu caminu ad personam chi pighit in cunsidériu sa vida de su malàdiu e is abisóngius suus. Totu custu ponendi a una parti - si ligit in d-una nota fata connosci de s'organizatzioni aprontadora de sa proposta - is "logus de s'esclusioni e de sa violatzioni de is diritus e de sa dignidadi umana". Boxi de sa campagna in agiudu de custas personis scarescias at essi su convegnu "Una Cara unu Nòmini", chi s'at a sboddiai gióbia 26 de su mesi de arbili in sa saba convegnus de s'hotel Reina Margaida de Casteddu. Is traballus ant a cumentzai a is 9.00, cun sa primu sessioni "Cali propostas políticas e giuridicas po unu propassamentu beru de is Opg", chi at a acabai a is 13.00 po su pràngiu. A oberri is traballus, chi ant a benni cordinaus de su giornalista Andrea Frailis, at essi Roberto Loddo, boxi de su Comitau Stop Opg Sardigna. Ant a pigai parti a s'atopu: Angela Quaquero, vici Presidenti de sa Provìntzia de Casteddu, Susanna Orrù, assessori a is Políticas Sotzialis de su Comunu Casteddu, Stefano Cecconi de sa Cgil, su giurista Sergio Moccia, Giovanna Del Giudice, boxi de su forum natzionali saludi mentali, sa presidenti de s'Unasam Gisella Trincas, sa giornalista Alessandra Sallemi, su Capellanu de s'opg de Barcellona Pozzo di Gotto Don Pippo Insana e su giornalista Ottavio Olita. Sa segunda sessioni de su convegnu, apitzus de su tema "Fàbricu de sceberus a s'Opg e a su presoni po interventu operativu in su territóriu", at a cumentzai a is 14.30. Is traballus de su merì ant essi intraus de Lalla Maxia de "Cittadinanzattiva" e ant essi cordinaus de su diretori de su Manifestu Sardu Marco Ligas. Puru custu programa at essi arricu de interventus, intre is calis cussus de is diretoris de su Dipartimentu Saludi Mentali de Casteddu e Tàtari, Augusto Contu e Donato Posadinu e su de su psichiatra de su Tzentru Saludi Mentali de Tàtari Antonello Pittalis. E tambeni, ant a fueddai: Alessandro Montisci, responsàbili de su Tzentru de Saludi Mentali Casteddu òvest, Ettore Cannavera, de sa Comunidadi Su Cúcuru, Antonello Murgia de Sos Sanidadi Sardigna, su giornalista de Ràdiu Sintony International Giovanni Runchina, Gianfranca Fois de s'assótziu Artículu 21, sa giornalista Maria Francesca Chiappe, sa segretària de sa Camera de su Traballu de Casteddu e su psichiatra de su tribunali Giampaolo Pintor. Po ndi sciri de prus telefonai a is númerus: 3381597287 (Gisella Trincas), 3316164008 (Roberto Loddo), 3472114917 (Francesca Fadda) o scriri un'e-mail a s'indiritzu: stopopgsardegna@gmail.com