Obertura ispidalis psichiatricus giuditziarius sardus. Su nono de su Comitau Stop Opg

(IlMinuto) – Casteddu, 3 de su mesi de maju - Funt duus is ispidalis psichiatricus giuditziarius prevìdius po sa Sardigna. Est a faci de s'ipótesi de custus logus de s'arrori chi benint lamaus ispidalis e chi po sa beridadi funt istruturas cartzeràrias gestias de su Dipartimentu de s'Aministratzioni penitentziària de su Ministeru de sa Giustitzia, chi su comitau Stop Opg at cumentzau un'àtera batalla in nòmini de sa tzivilidadi. Sa nova de s'obertura de is duas istruturas est stétia intendia de is membrus de su Comitau in sa diri chi si furiant sboddiendi is traballus de su Cunvégnu "Una Cara, unu Nòmini" chi s'est tentu gióbia passau in Casteddu. "Espressaus forti disdeni - pretzisat Roberto Loddo boxi de Stop Opg - po is determinus [...] pigaus po sa chistioni 'propassamentu de is Opg' chi ant a biri nasci in Sardigna manicomieddus chi sa normativa atuali, e su sabiori, no iat a permiti". Loddo cundierrat s'auséntzia puru de s'Assessori De Francisci de is traballus de "Una Cara, unu Nòmini". "Est una bregúngia - sighit su comunicau de imprenta - chi de una parti ddoi siat stétia sa mudesa totali e su dennegu a su diritu a su cunfrontu democràticu, e de s'àtera s'incapacidadi e s'inértzia istitutzionali a agatai sceberus giustus a rispetosus de is diritus umanus in is cunfrontus de is contzitadinus giai privaus de is diritus fundamentali insoru". Cun sa dimanda de una mesa de cunfrontu e cun su cumbidu a frimai is determinus pigaus asuba de s'obertura de is duus ispidalis psichiatricus giuditziarius, su Cumitau pedit a s'Assessori a sa Sanidadi "de programai is caminus ad personam po fai torrai is internaus de is Opg, comenti augurau de sa Campagna "Una Cara, unu Nòmini", in su rispetu is norma chi bolit su propassamentu de custas istitutzionis de esclusioni e isulamentu".