"Torra in presoni s'ajaja casteddaia de 79 annus". Sa denúntzia de Sotzialismu Diritus e Reformas

(IlMinuto) – Casteddu, 13 de su mesi de làmpadas - Una fémina de 79 annus, malàdia e po custu declarada in su 2009 no afatenti a abarrai in presoni, s'agatat torra inserrada in Buoncammino, in Casteddu. Ddu denuntziat Maria Grazia Caligaris, presidenti de s'assótziu Sotzialismu Diritus e Reformas, benendi a sciri ca S. M., casteddaia, est torrada in presoni poita, is cunditzionis de saludi, est bessiu a pillu in d-una vistia de controllu, no funt malas. "Fueddendi cun is volonteris de s'assótziu - si ligit in d-una nota de imprenta - sa fémina, trumbullada, at manifestau discumbéniu e dúbius po sa presonia noa e un'apensamentu mannu po sa saludi de unu fillu de 52 annus chi no si scit gestiri a solu e chi curàt issa. Est assurdu chi una personi de pagu prus de 80 annus - pretzisat Caligaris - depat abarrai in d-un'istrutura comenti Buoncammino".