"Unu mundu prus giustu e simpli po totus": in Casteddu su cunfrontu de ArtEco

(IlMinuto) – Casteddu, 2 de su mesi de argiolas - "Nisciunu sunfrit su fàmini poita nos papaus meda, ma poita no pentzaus abastàntzia; su problema nostru no est su de donai de prus, ma su de furai de mancu; si boleus chi su mundu mudit calencunacosa, tocat ca primu de totu is cosas mudint innoi de nos". Benit presentau aici, cun d-una frasi pigada de Alexander Langer, s'avenimentu "ArtEco: candu s'ecologia diventat arrexoni de dógnia diri". Aprontada de AseCon Ong – Amigus chentza làcanas cun s'agiudu de s'Assótziu sardu po su cumprimentu de sa reforma psichiatrica (Arsap) e de sa Coperativa Sotziali "Su Giardinu de Clara", sa manifestada s'at a sboddiai in Casteddu su 18, 19, 24, 25, 30, 31 de su mesi de argiolas de su 2012, de is 19.00 a is 23.00 in sa saba "Polifunzionale" de su parcu de Monteclaro. "Si ndi boleus stresiai de is arroris fillus de s'ecunumia de mercau chi - pretzisat sa nota de AseCon Ong – impoberat su prus de sa genti e chi fai arrica a pagu genti. Nos no boleus prus pigai parti a una sotziedadi chi tenit is arrexinis in is privilégius, asuba de is isperdítzius e apitzus de is difaréntzias". Est custu su coru de su pentzu chi ddoi est ingíriu a ArtEco. S'atopu tenit s'iscopu de trisinai, educai e informai apitzus de is bagas de is eco-scàmbius, de s'arti de su "riciclo", de s'alimentatzioni naturali e fata in su logu, asuba de su tempus benidori de sa bio-edilizia, de is energias "rinnovabili" e de s'avaloramentu de sa cultura e de is conoscéntzias de su logu. "Boleus - acrarant is aprontadoris - chi Casteddu tengat su mercau fissu suu de su "riciclo" e de is eco-scàmbius". Po ndi sciri de prus scriri a s'indiritzu e-mail: amicisenzaconfini@hotmail.it o telefonai a su númeru: 070651884