Atopus: arribat sa primu diri archeológica "Su Nuraxi Mereu"

(IlMinuto) – Casteddu, 19 de su mesi de ledàminis - S'at a isboddiai su 20 de su mesi de ledàminis sa primu diri archeológica "Su Nuraxi Mereu", aprontada de s'assótziu culturali T-Lab Shardana cun s'apógiu de sa Provìntzia de Casteddu, de su Comunu de Santu Perdu e de su de Sarròccu. Sa diri s'at a pratziri in duus mamentus. Su mangianu a cumentzai de is 9.30, agoa de s'atopu in Santu Perdu in pratza Aristanis, at essi dedicau totu a sa scampirrada de s'area archeológica Su Nuraxi Mereu; a cumentzai de is 15.30 imbecis, sa Saba Spiga at acasagiai su convegnu "Dibàtidu asuba de patrimóniu archeológicu de Santu Perdu e Sarròccu". In s'atóbiu, comenti si ligit in d-una nota de imprenta, "s'at a fueddai de s'istória, de is progetus de is Aministratzionis e de is possibilidadis culturalis- turisticas- de traballu de su Nuraxi Mereu, in d-un'aficu de isvilupu sustenìbili e responsàbili".

Diversus is nòminis chi ddoi ant essi a s'avenimentu, intre is calis amentaus s'archeólogu Nicola Dessì, su profesori Giovannino Sedda, maistu de istória de s'arti e Roberto Copparoni, espertu de turismu sustenìbili. A fai de mascotte a sa diri sa brabei in pasta "fimo" Brebì, fata de s'artista Nura Crea comenti símbulu de sa bolundati de agiudu de su pópulu sardu po acastiai, amparai e avalorai a s'ísula.