In Buoncammino cumpromitiu su diritu a sa saludi. Caligaris Sdr: "Netzessàriu ismamai is proceduras burocraticas"

(IlMinuto) - Casteddu, 18 de su mesi de ledàminis - "Sa Asl n.8 depit luegu providiri a assignai in su presoni de Buoncammino seti datoris ispecialistas. Sa lentesa in is proceduras burocraticas ferrit in modu grai a is presoneris conditzionant in manera negativa su diritu a sa saludi". Est cantu afirmat Maria Grazia Caligaris, presidenti de s'assótziu Sotzialismi Diritus Refomas, pretzisendi ca "su presoni, agoa de s'intrada de sa Asl in sa meixina penitentziària, depit essi cunsiderau comenti unu presídiu sanitàriu cun is figuras professionalis chi abisongiant a fiàntzia de is tzitadinus privaus de sa libertadi chi imbecis oindì presentant fresas grais in su serbítziu". In Buoncammino difatis no ddoi funt: su "pneumologo", s'ortopédicu, su chirurgu, s'otorinu, s'oculista, su fisioterapista e su neurologu. Cali sa càusa? A oi no funt stétius rennovaus is cumbénius chi ddoi furiant primu che funt giai iscadius de diversas cidas . "S'intrada in sa sanidadi penitentziària de is Asl in logu de su Ministreu de sa Giustítzia - afirmat sa presidenti de Sdr - in Buoncammino s'est amostendi comenti una realidadi incolliosa meda [...]. Is presoneris tenint arragus a fai bisitas cun is ispecialistas chi traballant a foras de su presoni, a otèniri is relatus chi abisongiant po imbiai a is Magistraus is dimandas de presonia domitziliari o de dilata pena po motivus de saludi e unu blocu atzumai totali de sa fisioterapia cun cuseguéntzias grais asuba de su protzessu 'degenerativo'".