In Monti Claro TrasformAzionis: unu laboratoriu po fueddai de Casteddu

(IlMinuto) - Casteddu 11 de su mesi de ledàminis - At essi sa saba "Polifunzionale" de su Parcu de Monti Claro de Casteddu a acasagiai "TrasformAzionis - Mudai in sa tzitadi chi mudat". S'atopu est po sàbudu 13 e domínigu 14 de su mesi de ledàminis de is 9.30 a is 19.30. Su laboratoriu interculturali ordingiau de s'Assótziu Terra Onlus cun s'agiudu de sa Coperativa Sa Caravana s'insertat aintru de su progetu Baobab, finantziau de sa Regioni Sardigna-Diretzioni Generali de sa Pública Istrutzioni. Su laboratoriu TrasformAzionis previdit su trisinamentu ativu de is personis, cun is calis - si ligit in d-una nota de imprenta - "S'ant a isperimentai sistemas de sceberu po s'amaistramentu apitzus de su tema de s'imigratzioni, asuba de is pregiuditzius e apitzus de is raportus Merdioni/Tramuntana de su mundu". No est totu. TrasformAzionis, difatis, at a atuai puru asuba de is mudamentus e de is trasformatzionis de Casteddu e apitzus de is formas noas de conviventzia chi si funt isperimentendi in tzitadi. Is iscritzionis a su laboratoriu a gratis scadint oi. Po ndi sciri de prus telefonai a is númerus: 070 500666; 340 28 20 403; 333 98 23434

Fotografia de il Maurone. Pigada de Flickr