Presonis: presoneri de Isili "Comenti si fait a andai ainnantis aici?"

(IlMinuto) – Casteddu, 15 de su mesi de ledàminis - "Scriu de su presoni de Isili po denuntziai s'acontéssia grai innoia s'agatant is presoneris in custa istrutura po mori de is aposentus disadatus. Cun 12 cumpangius de cellas mius cundivideus un'aposentu de 48 metrus cuadrus, incluius is letus e sa mesa. Una situatzioni insoportàbili". Funt custus is fueddus chi unu tzitadinu privau de sa libertadi scririt anoditzendi a s'assótziu Sotzialismu Diritus e Reformas sa cunditzioni in is calis funt custrintus a bivi is presoneris de su presoni de Isili. "Sigheus a andai ainnantis - sighit sa lítera - poita a turnu abarraus setzius asuba de is letus biu ca no ddoi at su logu po si movi. Lassendu stai su códomu iscassu po 13 personis. A su númeru mannu de cristianus in cella s'aciungit sa suspensioni de s'àcua a cumentzai de is 10 de su mangianu in custu modu medas no arrenescint nimancu a si fai sa dócia cun cusseguéntzias malas po sa coabitatzioni. No funt serbias a nudda is protestas chi eus fatu a is traballadoris de s'istrutura, issus puru difatis patit su discumbéniu chentza de podi agatai una solutzioni a is problemas". Un'acontéssia sa de su presoni de Isili - cumentat sa presidenti de Sdr Maria Grazia Caligaris - "balu de mancu crara e tolleràbili - poita contat sa de una colonia penali agricula, un'istrutura oberta, manna 650 étarus aundi is presoneris si dedicant a sa messarítzia e sa pastoria sendu acanta de sa libertadi". Marigosus e dobidoris is fueddus chi serrant sa lítera: "Comenti si fait a sighiri aici? Nos circaus de s'arragiai ma sighiri aici est foras de contu. Su Stadu si ndi iscarescit ca chini at fatu aerrus puru tenit una dignidadi e depit essi arrespetada".

Fotografia de Clarita82. Pigada de Flickr