Documentu: sos istudiantes de s'Assòtziu su Majolu a sa Consulta Rivolutzionaria

5 Onniasantu 2012


Adesione de sos Istudiantes de s'Assotziu su Majolu


A sa Consulta Rivolutzionaria e a s'assemblea in Casteddu su 7 de santandria.


Su disisperu chi est bivende sa Sardigna nos est faghende bìere su fallimentu de sas polìticas econòmicas e culturales de sos ùrtimos sessanta annos: dae un'oru a s'àteru de Sardigna bidimus una terra desolada, prena de muntonargios pro su bascaràmene industriale e militare, fàbricas chi tancant, aziendas de pastores e massajos serradas, traballadores disisperados chi gherrant pro su traballu issoro.


Sas iscolas e sas universidades nostras sunt postas semper peus, ca cada guvernu italianu chi àrtziat faghet riformas chi las bisestrant, distruende·las semper de prus.


Su guvernu italianu issèberat, a piaghere suo dae una die a s'àtera, de bogare sas facultades universitàrias e de pònnere sos dipartimentos, faghet leges chi faghent tancare sos cursos de làurea e ponet critèrios chene cabu pro sa partidura de sos finantziamentos cun sas universidades italianas: totu custu chene àere peruna connoschèntzia de sa realtade sarda e frigande·si·nche de sa crèschida e de s'isvilupu de s'istrutzione, de sa cultura e de s'economia in Sardigna.


Nois pensamus chi non podimus abarrare in manos de custa zente ca, pro fraigare una Sardigna lìbera e chi produit, amus bisòngiu de dare a sos traballadores e a sos tzitadinos sardos de cras un'istrutzione bona, lìbera e de cultura sarda.


Pro custu leamus parte a sa Consulta Rivolutzionaria ca pensamus chi comente sa Sardigna depet èssere soberana subra de s'energia, s'agroalimentare, sas tassas, s'ambiente e sos trasportos, gai etotu depet èssere soberana subra de s'istrutzione e de sas iscolas.


Sa Sardigna depet èssere Soberana, ca depet aer su pòdere de pònnere su Bilinguismu, imparende su sardu e impreende·lu fintzas pro imparare sas àteras matèrias in sas universidades e in totu sas iscolas de Sardigna; e pro imparare fintzas sa limba de su logu in sas àteras realidades linguìsticas de Sardigna: Carloforte, s'Alighera, Tàtari e sa Gaddura.


Bilinguismu cheret nàrrere traballu pro giòvanos meda chi diant intrare a traballare in iscola pro insinzare su sardu.


E cheret nàrrere traballu produtivu ca sa limba sarda est un'aina de isvilupu pro produire cultura, cussèntzia e crèschida econòmica.


Sa Sardigna depet èssere soberana, ca depet àere su podere de isseberare sos cursos de istùdiu in sas iscolas e in sas universidades, imparende fintzas s'istoria e sa cultura sarda e azudende sas produtziones nostras a s'isvilupare.


Sas universidades sardas depen servire mascamente pro fàghere isvilupare s'economia nostra, cun una chirca iscientifica chi siat ligada a sa realtade de su traballu in Sardigna pro fagher menzus sas produtziones nostras. Pro fagher custu sas universidades nostras depen traballare paris chin sos chi produin in Sardigna, ponende sos istudentes de sas matèrias tècnicas e iscientìficas a imparare non solu chin sos libros, ma fintzas ponende in pràtica su chi istùdian in sas aziendas de sa terra nostra.


Sa Sardigna depet esser soberana, ca depet àere su podere de mantènnere apertas sas iscolas de sas biddas nostras chene chi perunu gubernu apat su diritu de las tancare.


Pro custu s'idea nostra est un'Universidade e un'iscola sarda chi agiudent a totu su pòpulu nostru, a s'isvilupare in sa cultura e in s'economia:


Sa Sardigna depet esser soberana pro su chi pertocat s'Istrutzione e depet àere su podere de isseberare sos programmas, sas matèrias e sas limbas chi si depent impreare in sas iscolas e in sas universidades sardas.


Mèrcuris su 7 de santandria a sas 9 e mesu de mangianu, sos istudentes de Su Majolu ant a èssere in Casteddu, cara a su palatzu de su Consìgiu Regionale de Carrela de Roma, paris cun sa zente nostra in s'assemblea de su pòpulu sardu chi at mutidu sa Consulta Rivolutzionària, pro nàrrere a totus sos polìticos (de destra e de manca) chi si nche depent andare, ca sa neghe de su disacatu chi b'est in Sardigna est sa issoro.




© RIPRODUZIONE RISERVATA