Unu domínigu de traballu. Is maistus sardus no si frimant

(IlMinuto) - Casteddu, 29 de su mesi de totussantus - Insolita sa protesta chi at moviu a sa Tzitadi de Casteddu unus cantu de diri fait. Protagonistas is maistus de dógnia órdini e gradu chi si funt agataus domínigu a mangianu a is 10.00 in is iscaleras de Boaira po curregi is cómpitus. Unu mangianu de traballu, su de su 25 de su mesi de totussantus passau, chi at biu una centina de professoris fai sa professioni insoru a foras de is domus, a amostai ca is fainas de traballu de unu maistu no acabant cun is letzionis in àula. Funt diversas difatis is oras chi dógnia professori dedicat in d-una cida a sa curretzioni de is cómpitus, a sa programatzioni e a s'amaniada de is letzionis. Cun sa manifestada insolita is maistus artziant sa conca e narat ca nono a is irminorigamentus e sa proposta fata de su Guvernu Monti de aumentai s'oràriu de traballu insoru de 18 a 24 oras a sa cida. Sa genti est stétia informada de sa situatzioni chi pendit asuba de s'iscola cun d-unu bolantinu innoia ddoi furiat una tavèglia cun is càlculus de is oras de traballu de unu maistu, chi impitat 50 oras a sa cida po fai cun seriedadi s'atividadi sua. Ma no est acabada innoi, poita intre is fainas collegialis, esamus, iscrutiniu e iscedas a is famílias s'aciungint - pretzisant is profesoris - "àteras 10 oras a su mesi". Oindì su cambiamentu de is 18 a is 24 oras parrit incungiau in sobàriu, "ma - acrarat Franco de Fabiis, professori de s'Istitutu Levi de Cuartu e Rsu Cobas - timeus a un'àteru blitz". Comenti est naturali sa puba de atacus nous a s'iscola pública pendit asuba de is apinnícus de is maistus chi no frimant a sa lota insoru in faori de su diritu a s'istúdiu e de sa cultura.

Fotografia de consul78. Pigada de Flickr