"Manifestaus po sa língua nostra". Su Majolu difendint a sa língua sarda

(IlMinuto) – Casteddu, 5 de su mesi de paschixèdda - No si frimat s'impignu de s'assótziu de is istudiantis Su Majolu in faori de su sardu. Agoa di ai pigau parti a sa Cuferéntzia regionali de sa língua sarda chi s'est tenta in Azos sàbudu e domínigu passaus, innoia ant contau su traballu fitianu chi isboddiant aintru de s'Universidadi de Tàtari po torrai a donai dignidadi a su sardu, un'àteru atopu ddus at a biri in primu línia. Fueddaus de su sit in chi s'at a isboddiai su 13 de su mesi de paschixèdda a is 10.00 in sa pratza de s'Universidadi tataresa. Tema de sa manifestada de sa cali Su Majolu est aprontadori est sa ratífica de sa Carta europea de is línguas regionalis e de minoria, sbisuriada de su parlamentu italianu, chi imbecis di avalorai a sa língua sarda e a s'insertamentu suu in s'iscola, in is média e in sa giustítzia, comenti previdint is standard europeus istabilius de su Consillu di Europa, dda penalitzat e dda abasciat a língua de segundu classi. Cun su sit-in is istudiantis de Su Majolu bolint difèndiri a is diritus de sa Sardigna pedendi a s'assembrea legislativa chi bengant postus livellus prus artus di amparu po sa língua de su pópulu sardu. Su sardu est difatis sa segundu língua prus fueddada agoa de s'italianu cun prus de 1milioni de chistionadoris. Is sardus - declarant is Istudiantis in d-una nota chi promovit a su sit-in - "depint tenni su diritu de podi fueddai sa própriu língua cantu e prus de s'italianu, in totu sa vida pública de sa Sardigna, cumentzendi de is iscolas, de is ofítzius públicus e de is média".