S'azienda petrolifera de is Moratti sighit a insìstiri in su progetu suu

(IlMinuto) – Casteddu, 12 de su mesi de martzu - Po sa Saras est arribau su mamentu de sa presentada de s'Istúdiu de Atùbidu Ambientali asuba de su Progetu Lianora. Mérculis 13 de su mesi de martzu at essi sa diri decisiva: in Aristanis sa Saras S.p.A a is 12.00, in is aposentus de un'hotel tzitadinu, "at a informai is media de s'incumentzu de sa procedura regionali de su Progetu Lianora e at a mostai su progetu e su chi contenit s'Istúdiu de Atùbidu Ambientali". "Pigaus atu un'atera borta - afirmat su Comunitau cívicu 'No a su Progetu Lianora' - ca sa Saras no est interessada a su chi pentzant is tzitadinus, is aministratzionis e is fortzas produtivas de Arborea e de sa provìntzia de Aristanis". Mancai is delíberas de arrialia de seti comunus, duus unionis de comunus e de su Consillu Provìntziali de Aristanis, mancai s'arrialia amostada e tzerriada a boxi arta de totu su cumpartu sótziu produtivu e de is tzitadinus de Arborea, s'azienda petrolifera de is Morati sighit a afarrancai in su progetu suu de bogadura de idrocarburus in su coru de is satus agricolus de Arborea, acanta de s'oasi naturali de S'Ena Arrubia. Sa Saras - andat ainnantis - acrarat su Comitau - cun s'intentu de trumbullai de unu totu sa realidadi económica e ambientali nostra". "Nos no eus a abarrai frimus - remarcant determinaus - eus a sighiri a s'opòniri e a arremaciai su Nono nostru. e a ddu arremaciai no funt scéti is membrus de su cumitau No a su Progetu Lianora, ma totu sa genti de Arborea, incluius is pipius suus".

Fotografia de the|G|â„¢. Pigada de Flickr