Avalorai sa cultura si podit. In Sàdili nascit Campus de is Istòrias

(IlMinuto) – Casteddu, 20 de su mesi de maju – Unu terrenu arau una perra a matas de obia e s'àtera a suergera, unu coddu de terra de pagu prus de un'étaru chi cundullit su tzentru istòricu de Sàdili, at essi custa sa domu de su parcu literàriu "Campu de is Istòrias". Difarenti a petus de is àterus parcus chi s'agatant, Campu de is Istòrias est dedicau a totus is iscritoris de su mundu, de su tempus andau e de su tempus benidori, e, cosa de importu mannu, a is ligidoris puru. Un'omàgiu mannu a sa literadura, unu logu innoia dògnia mata at pigai su nòmini de unu scritori e in donniuna s'at agatai un'ampulla aundi ddoi ant essi allogaus is contus. Su ligidori, po podi gosai de s'iscritu at a depi istupai s'ampulla. Unu progetu su de sa bidda de sa Barbaza chi est de tambeni de acabai. In su teretu de terra, difatis depit nasci puru una bibliotechedda chi amanniat sèmpiri de prus s'arrichesa sua gràtzias a is lìburus arregallaus no scéti de is sardus, ma de is de continenti puru. "Campu de is Istòrias" at  a aghilliri avenimentus de literadura e de àteras artis, bessidas a tema literàriu,  gitas iscolasticas e at essi unu furriadroxu puru po iscritoris e artistas. Unu progetu de cultura e po sa cultura chi nascit cun s'iscopu de avalorai sa bidda puru cun is "istatzioni dromias", is logus prus bellus de Sàdili ant a fai parti de su parcu atressu de is contus de is iscritoris e de is artistas, chi s'ant a isboddiai in is avenimentus, chi ant a iscidai su tezntru istòricu, su boscu de Tiricu, sa Gruta de is Janas, su Stampu de su Turrunu, is Cascada de Santu Valentinu e àterus medas. Po portai a cumprimentu custa proposta s'assòtziu sadilesu Alba Scriptorum at fatu un'antologia innoia s'agatant 15 òperas de iscritoris sardus.