Is Cobas denuntziant sa vangàntzia de sa Dirigenti Iscolastica de Posada contra a is maistas contràrias a is quiz invalsi

(IlMinuto) – Casteddu, 27 de su mesi de maju - Sa Dirigenti Iscolastica Rigenti de s'Istitutu Cumprensivu de Pasada, Antonella Piredda, at incarrerau unu procedimentu disciplinai in is cunfrontus de duas maistas, Gonaria Carroni e Maria Andreana Deledda, in serbìtziu in s'iscola elementari de sa bidda. Est cantu denuntziant, cun d-una nota de imprenta is Cobas Sardigna, pretzisendi ca su 7 e su 10 de su mesi de maju passau s'invalsi at aprontau is proas de "valutatzioni natzionali" in totus is iscolas elementaris italianas, e ca po sa diri de su 7 de su mesi de maju iant lamau un'iscióperu de is iscolas maternas, de is elementaris e de su personali Ata, pròpriu po murmurai contra a is Quiz Invalsi e po fai faddiri is proas. Mantessi iscióperu est stétiu lamau su 14 de su mesi de maju passau in is iscolas médias, e su 16 de su mesi de maju passau in is superioris. In s'iscola elementari de sa Baronia totus is maistas, su 7 de su mesi de maju, ant pigau parti a s'iscióperu bòfiu de su sindacau, s'iscola est abarrada serrada e is quiz no funt stétius fatus, aici comenti est acontéssiu in medas àterus istitutus, siat sardus, siat italianas. In Sardigna is test, difatis, no si funt isboddiaus in totu is tres diris  in d-unu numeru mannu de iscolas, e in classis medas, gràtzias a s'adesioni manna chi at tentu s'iscióperu de maistus e traballadoris iscolasticus e de s'adesioni puru de tantis istudiantis de is superiorioris chi impari a is babus e mamas ant pigau su determinu de s'arringherai contra a "s'iscola de is istibignus". "Su 10 de su mesi de maju passau - pretzisat su comunicau de su sindacau - in s'iscola de Posada puru (mancai su fallimentu, po mori de s'iscióperu, de is quiz de su 7 de su mesi de maju), sa Dirigenti Iscolastica pretendiat, cumentisiollat, chi essant benias fatas fai is proas de matemàtica a is iscientis de is segundas classis e de sa cuinta classi de is elementaris". Ma in Posada, comenti in àterus logus, is babus e is mamas contrariaus de custa pràtiga chi no est nimancu obbligatória, ant lassau is fillus insoru in domu. In duas segundas difatis ddoi furiat scéti un'iscienti in d-una classi ,e duus in s'ùnica cuinta. Mancai totu - marcant is Cobas - "sa Dirigenti boliat fai is test a sa marolla [...]" puru si  "In is diris primu - si ligit - is cullegas iant imbiau una nota iscrita a sa Dirigenti Iscolastica comunichendiddi ca no furiant fasias a sutaponi is pròprius pipius a is Quiz Invalsi, po arrexonis didàticas i éticas, tenendu arrepestu mannu po su pròpriu arrolu e a amparu de sa libertadi de imparamentu". Ma su 10 de su mesi de maju sa Dirigenti Iscolastica Antonella Piredda si furiat posta a conca de fai is test invalsi, i est aici chi at presentau duus ordinis de serbìtziu a is cullegas Carroni e Deledda cun s'iscopu de ddas obrigai a fai is proas. Ma is duas maistas ant intzaras trasmitiu a sa Piredda una decraradura de is babus e is mamas de is tres iscientis chi funt intraus in iscola, chi pediat de fai letzioni comenti sèmpiri . Carroni e Deledda tenedu arrespetu mannu po sa professioni insoru e arrespetendi su pédiu de is babus e de is mamas no ant fatu fai a is iscientis nisciuna proa invalsi. A custu puntu Antonella Piredda su 24 de su mesi de maju passau, at intimau s'incarreramentu de unu procedimentu disciplinai in is cunfrontus de is cullegas Carroni e Deledda  scéti "po ai fatu su pròpriu traballu - si ligit in sa nota de su sindacau - e po ai assegurau [...] is isceras de is babus e de is mamas". I est scéti po ai fatu su doveri insoru ca is duas maistas depint patiri unu procedimentu disclinai po affatallus grais e atus no cunformis a sa responsabilidadi e a is doveris, atus chi po sa Piredda, no funt currégius a petus de sa funtzioni de educadori e de imparadori. A faci de su provedimentu pigau de sa Dirigenti Iscolastica in is cunfrontus de is duas cullegas, is Cobas Sardigna annuntziant ca ant a difendi a is maistas Carroni e Deledda, e ca ant a chesciai in tous is domus adatas, contra a custu atacu de no crei, a sa libertadi de imparamentu e de fueddu "chi - cocluit su comunicau - fait tambeni prus ridìculu totu su barraconi de s'invalsi e is fatzindinus e fidaus faidoris suus"