Sighit sa màrcia de su No a su Progetu Lianora. Frimada benienti: Marrùbiu
Image
(IlMinuto) - Casteddu, 16 de su mesi de maju - Sighit sa màrcia po su No a su Progetu Lianora. Est prevìdiu difatis po sàbudu 18 a cumentzai de is 18.00, in sa domu de sa Consulta Giovanili di Marrùbiu, in arruga Arborea 5, s'atopu "Progetu Lianora": Is arrexonis de su No! - No a su Progetu Lianora!". Su progetu in chistioni, ddu amentaus, permitit a sa sotziedadi Saras S.p.a. sa circa de idrocarburi licuidus e gassosus atressu de su cumprimentu de unu putzu averiguadori in su territòriu de Arborea, a 187 metrus de su tretu ùmidu de S’Ena Arrubia, logu amparau de sa Conventzioni interenatzionali de Ramsar. Sa "circa" in cantieri s'iat a depi fai acanta de is domus, de is aziendas de sartu e de allibamentu e, acanta puru de su campégiu comunali “S’Ena Arrubia”. Unu progetu chi no praxit a is tzitadinus e a is diversas aministratzionis comunalis de su territòriu sardu. Unu pranu chi, de s'àtera perra, sa Saras narat essi un'importanti proposta po s'isvilupu de su territòriu, e chi comenti amostau prus de una bia de is istudiosus de su Cumitau cìvicu No Progetu Lianora, si mandau ainnantis, iat a ponni diaderus a arriscu su territòriu. Ant essi pròpriu is arrexonis de su no a movi s'atopu marrubiesu chi, agoa de is saludus de su sìndigu Andrea Santucciu, at a biri is relatas de su presidenti de sa consulta de Marrùbiu, aprontadora de s'avenimentu, e a sighiri is de su presidenti de sa consulta de Terraba e de su presidenti de sa consulta de Arborea, sa proietzioni de su videu "Ghia No a su Progetu Lianora" e sa relata de s'acabu de su cumitau "No a su Progetu Lianora".
© RIPRODUZIONE RISERVATA