Su 30 de su mesi de maju. Sa diri de sa Saras

(IlMinuto) – Casteddu, 17 de su mesi de maju – Sa Saras S.p.a movit acusas grais meda in is cunfrontus de su Cumitau Cìvicu de Arborea, afirmendu ca funt responsàbilis de ai serrau dògnia possibilidadi de chistionu. Una cosa foras de contu biu ca - comenti pretzisat in d-una nota de imprenta su Cumitatu - est s'azienda chi: "at recusau de pigai parti a tous is atopus pùblicus chi custu Cumitau at promòviu a cumentzai de su mesi de paschixèdda de su 2011". Seus fueddendi de mantessi azienda, ddu amentaus, chi in primus mesis de su 2012 iat declarau de essi favoràbili a presentai su Progetu Lianora in Arborea "scéti una borta otentus is permissus po su putzu averiguadori", est a nai candu teniat sa seguresa de podi ponni is pertusas in su territòriu de sa bidda in provìntzia de Aristanis. Ma no est acabada innoi, si fueddat de sa mantessi azienda chi at fissau puru s'atopu pùblicu po su 30 de su mesi de maju, a mangianu, in diri de giòbia, in d-un'Hotel chi est atesu cuatru chilòmetrus de Arborea. "Comenti mai - si pregutat su Cumitau - totus is àteras assembreas chi no furiant ufitzialis funt stétias fatas de sàbudu?". Si sa Saras bolit amostai de essi pronta a su chiostionu po su Cumitau ddoi at scéti una cosa de fai "remandai s'assembrea a su 1 de su mesi de làmpadas e a s'organitzai po dda fai in su Teatru de is Salesianus, in su coru de Arborea, po assegurai su nùmeru de genti prus mannu"