Su grupu Sel-SardignaLibera depositat interrogatzioni asuba de is montixeddus de arena de Badèsi

(IlMinuto) – Casteddu, 23 de su mesi de maju - Funt a arriscu mannu is montixeddus de arena de Badèsi, sighint difatis chentza de istrobu is coladas mannas de ciumentu po su cumprimentu de unu residence chi at a andai a fai dannus mannus a s'ambienti. Comenti giai marcau de is assòtziu ambientalistas Amigus de sa Terra e Grupu de Interventu Giurìdicu, comenti nau puru in s'interrogatzioni n. 699/A fata de sa consillera de SardignaLibera Claudia Zuncheddu e depositada in su Consillu de sa Ras su 12 de su mesi de paschixedda de su 2011 e in cussa depositada in sa Comissioni Europea Cumpetenti, is perìgulus chi pertocant a su progetu de "cementificazione' funt diversus, cumentzendi de su pranu de lotizatzioni chi candu scadit at a "intzimai s''inedificabilità' de is cumpartus chi abarrant e de is sìngurus lotus chi no funt stétius fatus". Ma no est totu poita comenti at pretzisau purue s'abogau Delipieri, abistu in matéria de diritu ambientali  "is plaias - chi funt una perra de su demàniu marìtimu - e sa tenta de is 300 metrus de sa riba marina funt amparadas cun ispetzìficu lióngiu de cunservatzioni integrali". Su documentu marcat puru comenti su tretu interessau siat "asuba de su mari e amantau po su prus de tupa mediterrànea amanniada, est amparada cun ispetzìficu lióngiu paesagisticu e interessat  su giassu de importu comunitàriu – Sic 'Foxi de su Coghinas'". Berus est puru ca is biddixeddas turisticas prus mannas de cincu étarus, tzentrus residentzialis turisticus e fainas de ospedàgiu cun  300 letus e prus o cun d-unu volùmini pesau prus mannu de 3milla metrus cubus, o chi ocupant una subrafaci prus manna de 20 étarus, bogaus is chi tenint recaida aintru de is tzentrus abitaus, no funt stétius sutapostus a averiguatzioni de "assoggettabilità", est a nai a s'anàlisi po Valutatzioni de atùmbidu ambientali prevìdia de sa lei po su cumprimentu de su residence. Po custas arrexonis su grupu Sel-SardignaLibera at lassau s'interrogatzioni Zuncheddu, Cocco, Sechi, Cugusi cun pregunta de arrespusta iscrita asuba de s'afatallu grai meda de sa "procedura de averiguatzioni 'assoggettabilità – screening' prevìdia de sa lei po is traballus chi si funt isboddiendi in is montixeddus de arena de is plaias de Badèsi e apitzus de su destrossu intzimau de is canteris edilitzius po su cumprimentu de is fàbricus a aprigu de s'oru de su mari, in d-unu tretu amparau de acàpiu paisagisticu e chi s'agatat in Giassu de interessu Comunitariu".