Trasportus: sa terra tremit po is cumpangias Moby, Snav, Forship, e "Grandi navi Veloci"

24 Maju 2013
Image
moby.jpg
(IlMinuto) – Casteddu, 24 de su mesi de maju – Novas bonas lompint de su fronti de is navius, podeus isperai in d-una sentèntzia de cundenna a is cumpangias de navigatzioni chi ant poderau is prétzius artus medas. S'Antitrust s'est difatis incarrerendi a s'acabada de su protzedimentu po valutai si is cumpangias de navigatzioni chi tenint sa gestioni de is navius in Sardigna apant fatu cartellu po poderai is prétzius artus medas, comenti denuntziat puru, s'assòtziu de is consumadoris "Altroconsumo". Su determinu de s'Antitrust at a arribai in su mesi de làmpadas e "po comenti funt girendi is cosas - si ligit in d-una nota de s'Assòtziu de is Consumadoris - no est impossìbili chi si lompat a una cundenna de is cumpangias". E a sighiri ddoi at essi s'amissioni in sa Class Action de Altroconsumo cun sa cali s'at a pediri chi is passeggieris siant remborsaus de su dinai fuliau ingiustamenti. No est difitzili a s'amentai is fatus, candu in is istadis de su 2011 e de su 2012 is prétzius de is navius funt crescius de meda apetus de is de su 2010. "Su chi iaus apubau - marcat Altroncosumo - furiat - a s'epoca de su spriculitu un'impunnada a s'acórdiu intre is cumpangias". Atressu de sa Class Action s'assòtziu de is consumadoris pedit a su giugi chi bengat averiguada sa violatzioni de is arregulas asuba de sa cuncurrèntzia e chi bengat torrau a is passeggieris pagu prus de sa metadi de su dinai bogau. Is chi ant pigau billetus de e po Sardigna in is annus 2011 e 2012 cun is cumpangias Moby, Snav, Forship, e "Grandi navi Veloci" po ndi sciri de prus depint pigai cuntatus cun Altroconsumo.
© RIPRODUZIONE RISERVATA