Ulìana si fait bella e si bistit de froris

31 Maju 2013
Image
Oliena-in-fiore.jpg

(IlMinuto) – Casteddu, 31 de su mesi de maju – S'est isboddiada ariseru a mangianu, in su Ghetto de Casteddu, sa cunferèntzia de imprenta chi at presentau s'avenimentu "Ulìana in frori", sa manifestada artìstica, culturali, de s'artesanau e de sa cosa de papai, chi at a allirgai de s'1 a su 24 de su mesi de làmpadas chi benit, is arrugas e is satus de su comunu nugoresu. A sa presentada ghiada de su diretori de sa domu de imprenta Tema Aldo Brigaglia, ant pigau parti puru is rapresentantis de is entis aprontadoris de sa proposta: su responsàbili de s'agentzia regionali Sardigna Promotzioni Renato Tommasi, su presidenti de sa Càmara de Comértziu de Nùgoro Agostino Cicalò e l'assessori a su Turismu de su Comunu de Ulìana Martino Salis. Po Tommasi, "Ulìana in frori" est "una proposta de valori mannu chi giuat po ndi fai bessiri a pillu su territòriu de aintru a petus de s'ìsula restanti, ma totu su territòriu sardu puru a s'Itàlia e a s'esteru". Un'avenimentu, su de sa bidda in provìntzia de Nùgoro, chi trisinat is àteras biddas carreralis, difatis unu nùmeru mannu de artesanus e artistas de s'arroedu ant a aparai is pròprius òperas in sa manifestada. Unu mesi s'iscerau - comenti marcat Salis - "po atirai is circulatzionis turisticas po tres cidas, cun mostras e avenimentus de ingrangulamentu mannu". In s'insuteris sa màchina aprontadora callentat is motoris e s'incarrerat a s'inauguratzioni, totus e tres is entis ant incarau su renovu de sa manifestada giai in su 2014, arreconoscendi duncas a "Ulìana in frori" una frecuèntzia annuali e no prus, comenti furiat, un'isboddiadura dògnia duus annus


© RIPRODUZIONE RISERVATA
Tags