In Biddacidru sa XXVIII editzioni de su Prémiu Dessì

17 Cabudanni 2013
(IlMinuto) – Casteddu, 17 de su mesi de cabudanni - Est totu apariciau po sa XXVIII editzioni de su cuncursu literàriu dedicau a s'iscritori sardu Giosepu Dessì. S'avenimentu, chi tenit s'agiudu de su Ministeru po is benis e is Fainas Culturalis, de s'Assesorau de sa Pùblica Istrutzioni e Benis Culturalis de sa Regioni Autònoma de Sardigna, de su Comunu de Biddacidru, de sa Fondatzioni Bancu de Sardigna, de su GAl Monti Linas e de Lìberos puru, at essi comenti sèmpiri aghilliu in Biddacidru, sa tzitadina de su Campidanu de Mesu innoia Dessì iat biviu su perìodu de sa primu istrutzioni sua e chi at fatu nasci diversus iscritus, intre custus su romanzu prus connotu, "Bidda de umbras" (Prémiu Strega in su 1972). Oi in Biddacidru s'at a oberri unu programma arricu de atopus chi s'at a serrai domìnigu 22 de su mesi de cabudanni cun sa cirimònia chi at a annuciai is bincidoris de is duas setzionis literàrias in cuncursu: narrativa e cantzoni. A si giogai su lau finali po sa narrativa ddoi ant essi Giosepu Lupo cun "Biaxadoris de nuis" bessiu cun Marsilio, Fabiu Stassi cun "S'ùrtimu baddu de Charlot" publicau de Sellerio e Giuanni Màriu Villalta cun "A sa fini de una pitzinnia ditzosa" de Mondadori. Tres is chi funt arribaus in finali po sa setzioni catzoni puru: Giuanni Pieru Bona cun "Serenadas po s'ànghelu" bessiu cun Passigli, Cràudiu Damiani cun "Sa figu asuba de sa fortalesa" de Fazi Editori i Erricu Testa cun "Ablativo" po Einaudi. Domìnigu in su merì ant essi donaus puru su prémiu ispeciali de sa zuria a su giornalista e crìticu de arti Philippe Daverio e su de sa Fondatzioni Dessì, chi ocannu at a tocai a s'artista Pinuccio Sciola. In abetu de sa festa manna de s'ùrtima diri de s'avenimentu est arribendi una cida de presentadas, ispetàculus e atopus de no pèrderi
© RIPRODUZIONE RISERVATA
Tags