In Bànari "Dies a Bolu"

(IlMinuto) - Casteddu, 11 de su mesi de ladàminis - BÀNARI. S'amministratzione comunale e “Su Sòtziu pro sa gara” organizant “Dies a bolu”, tres dies de istùdiu e de poesia improvisada in sa bidda de tziu Barore Sassu, su grandu poeta de gara chi est connotu in sa Sardigna intrea. Chenàbura su 18, a oras de sas 10,30, s'at a comintzare in Tiesi (in su salone de sa “Pro Loco”) cun sos pitzinnos de sa II A chi ant a dare “su tema” a sos poetas Zosepe Porcu, Dionisi Bitti e Brunu Agus (acumpangiados dae “Su Cunsonu Tiesinu”). A pustis de custu cantu de gara sos pitzinnos s'ant a disafiare intre “otavas serradas” e versos rap. Sàbadu e domìniga “Dies a bolu” torrat in Bànari. In sos locales de “Sa Caminera” (a dae segus de sa Crèsia de Santu Larentu) s'ant a tènnere sos seminàrios, ambos duos a oras de sas 10.

Su sàbadu s'at a faeddare de “Sas traditziones orales e s'identidade sarda”; sa domìniga non amus imbetzes a pregontare “Cale prospetivas pro sa poesia improvisada in Sardugna?”. A sos seminàrios ant a partetzipare espertos (Bustianu Pilosu e Pàulu Pillonca), improvisadores (Brunu Agus, Zosepe Porcu, Remu Orrù, Pàulu Zedda), professores de is Universidades de Tàtari e Casteddu (Maria Margarita Satta e Ignazio Macchiarella) e sos istudiantes de Antropologia culturale de su Dipartimentu de Istòria, Iscièntzias de s'òmine e de sa formatzione de Tàtari. Sas garas poèticas s'ant a tènnere issas puru su 19 e su 20 in Bànari. Sàbadu, dae sas 4 de borta e die, s'ant a alternare “is cantadoris campidanesos” (Arrepentina e Mutetu Longu) e sos “bertsolaris” bascos. Dominica o oras de sas 9 de sero sa serrada cun sa traditzionale “gara logudoresa” cun Zosepe Porcu, Nigola Farina e Barore Iscanu. Leghe su programma intreu in sa pàgina Facebook de s'eventu.

M.P.