Bìviri sa tzitadi de protagonista cun "Casteddu Life"
(IlMinuto) - Casteddu, 3 de su mesi de ladàminis - Su tìtulu est "Casteddu Life", su tema est ùnicu: contai sa tzitadi de Casteddu po ndi fai bessiri a pillu s'arrichesa: s'interessu istòricu, naturali, culturali, ma is costumantzias e is carateristicas puru. S'istrumentu est scéti su web. Cun d-unu progetu giòvanu sa web Agency Altavista tenit s'iscopu de "fai bessiri a pillu a manera diversa e prus familiari is chi funt is carateristicas ùnicas" de sa primu tzitadi de Sardigna. "Donendi atentzioni - si ligit in d-una nota - a is esperiéntzias personalis, a is parris difarentis, a su pigai parti in modu ativu de is ligidoris".
No una ghia comenti medas cun logus de biri, duncas, "Casteddu Life" est calincuna cosa de prus: "s'avaloramentu de Casteddu depit cumentzai prusatotu de is chi dògnia diri dda bivint, - si pretzisat - po custa arrexoni boleus fai bessiri a pillu is facis chi rapresentant sa normalidadi de sa genti chi s'agatat, ma no scéti custu, boleus amostai puru Casteddu comenti logu de interessu po is chi si castiant de a foras. Identifichendusì in is chi bolit connosci is facis de interessu prus mannu chi tenit sa tzitadi, eus a donai consillus profetosus cundius de is esperiéntzias fatas e arricaus de is parris de is ligidris nostrus".