Sciéntzias Forestalis de Nùgoro: istrobus grais po is istudiantis. Sa solidariedadi de a Manca

10 Ladàminis 2013


(IlMinuto) – Casteddu, 10 de su mesi ladàminis - No ant a tenni prus sa possibilidadi de gosai de un'aposentu a gratis e nimancu de otèniri unu cànoni de afitu prus bàsciu. Protagonistas de custu istrobu mannu funt is istudiantis de su cursu de laurea de Sciéntzias Forestalis de Nùgoro. Responsàbili de custa acontéssia est s'Ersu de Tàtari, chi tenit sa nexi de no ai annoau su cuntratu de apesonamentu cun is meris de is apartamentus assegnaus a domus de s'Istudianti. Una situatzioni chi ferrit in malu modu s'ecunumia familiari de is chi benint de foras, chi si bint custrintus a pigai aposentus a prétzius de mercau. Ma is arrutroxas de s'Ersu de Tàtari no funt acabadas innoi. S'enti, difatis, at tambeni ingrussau is arragus econòmicus de is universitàrius no annoendi - custu est su chi si registrat fintzas a imoi - su cumbéniu cun is ristorantis e is "tavole calde" chi in is annus passaus ant assegurau su serbìtziu mensa a gratis o a prétzius baratus a is istudiantis. "Custu est un'àteru atu chi testimongiat sa boluntadi de scodronai s'Universidadi in Nùgoro - cumentat in d-una nota de imprenta sa setzioni nugoresa de a Manca pro s’Indipendentzia Paschedda Zau -, bia comenti unu càrrigu chi pesat asuba de is bilantzus postus mali meda de s'Universidadi de Tàtari e Casteddu e de s'Enti regionali chi s'interessat de assegurai su diritu a s'istùdiu universitàriu". "Sa cosa prus marigosa - pretzisat sa manca indipendentista - est a depi acertai ca, in su mentras ca s'Universidadi in Nùgoro benit destruida abellu abellu impari a is serbìtzius po is istudiantis, su fàbricu de sa caserma de s'esercitu in Pradu sighit in manera lestra". Est difatis de 12milionis de eurus sa summa de dinai chi a su primu mamentu furiat po s'edilitzia universitària e chi agoa est stétia istrentzia po essi impitada in su fàbricu de sa caserma. "Sa populatzioni nugoresa - s'arremaciat in sa nota de imprenta - podit biri in modu sèmpiri prus craru ca s'afortiamentu de s'universidadi no est àintru de is progetus chi is istitutzionis italianas portant a conca po sa tzitadi de Nùgoro". S'arretzeta inditada de a Manca est simpli, e fundada asuba de s'isvilupu de is produtzionis de is territòrius e asuba de s'avaloramentu de sa cultura de su pòpulu sardu. "S'Universidadi est s'istitutzioni chi podit auniri custus duus campus de istùdiu e de circa - marcat su comunicau - po un'isvilupu beru de su territòriu nostru, e duncas est un'istitutzioni istrategica po su tempus benidori de Nùgoro". No scéti donat sa solidariedadi sua a is istudianti, ma a Manca pro s’Indipendentzia ddus cumbidat puru a no mollai e a "mandai ainnantis impari sa cumbata po sa créschida de s'Universidadi in Nùgoro.



© RIPRODUZIONE RISERVATA