Traballu 11 incidentis mortalis in su 2013. Cuàturu mortis scéti in sa provìntzia de Aristanis

11 Mese de idas 2013
Image
incidenti-mortali-300x221.jpg

(IlMinuto) - Casteddu 11 de su mesi de paschixèdda - Funt stètias 11, intre su mesi de gennàrgiu e su mesi de ledàminis, is mortis in su traballu in Sardigna. Est cantu ndi bessit a pillu de sa relata fata connosci de s'Osservatòriu asuba de sa segurantza apitzus de su traballu "Vega Engineering", cun datus annoaus a su 31 de su mesi de ledàminis de su 2013. Grai, po su prus, sa situatzioni de s'aristanesu, innoia in is primus 10 mesis de s'annu funt stètias cuàturu is mortis in su traballu. Sa provìntzia de Aristanis registrat unu pesu statisticu (cuàturu mortus asuba de unu totali de 55.413 traballadoris) artu meda, chi in su stadu italianu (colonia sarda puru) est segundu scéti a sa de sa provìntzia abruzesa de Chieti. Is àteras provìntzias sardas - in sa mantessi classìfica annicada po provìntzia (ca, pretzisaus, collegat su nùmeru de incidentis mortalis in su traballu a su nùmeru totali de is traballadoris in su territòriu provintziali) agataus a su 7° postu s'Ogiastra (unu mortu in su traballu), a su 48° Casteddu (cuàturu mortus in su traballu), a su 57° Tarranóa-Tèmpiu (unu mortu) a su 93° Tàtari (unu mortu). A cabudu a sa classìfica, a su 103° postu (cun nimancu unu mortu in su traballu a su de su mesi de ledàminis) agataus imbecis is provìtzias "prus seguras": Nùgoro, Campidanu de Mesu e Crabònia-Igrèsias.


Fotografia de antonino lombardo. Pigada de Flickr


© RIPRODUZIONE RISERVATA