In Tàtari “Open Heart”: in amentu de Giuannemarcu Pinna

(IlMinuto) – Casteddu, 24 de su mesi de fiàrgiu - At essi fatu biri oi a is 19.30 in su Cìrculu Culturali Enogastronomicu "Su Mùlinu Bèciu" de arruga Frigaglia 5 in Tàtari su film “Open Heart”. S'avenimentu, aprontau de su Grupu Emergency Tàtari, bolit amentai a su tènnicu "perfusionista" de cardiuchirurgia tataresu Giuannemarcu Pinna mortu dexi annus fait in s'incidenti malu meda in is Montis de Is Setti Fradis, candu s'aèreu chi furiat portendi unu coru in s'ispidali Brotzu de Casteddu po unu trapiantu furiat arrutu fadendi sa morti de is mèicus e is traballadoris de s'echipàgiu chi s'agatànt ingunis. Su documentàriu contat s'istòria de otu pipius ruandesus malàdius meda, chi lassant sa famìlia insoru po si ponni in viàgiu po fai un'operatzioni a su coru in su “Salam Centre”, s'ispidali de Emergency obertu in Khartoum, in Sudan, in su 2007 ùnicu tzentru de cardiuchirurgia cun is cardiologus prus bravus e chi traballant a gratis de totu s'Africa. Ant a sighiri, agoa de su film, is relatas de su mèigu Giusi Canestrelli e de s'infermiera professionali Sandra Nufris, chi ant a contai is esperièntzias fatas in su “Salam Centre”. Su merì at a sighiri cun d-unu murtzu po arregolli dinai. Su guadagnu - si ligit in d-una nota de imprenta - "at a andai a Emergency e at serbiri a agiudai su programa Sudan e s'atividadi de su Tzentru "Salam" de cardiuchirurgia in a Khartoum".