Santorini: su logu giustu pro is giòvanos

(IlMinuto) – Casteddu, su 29 de abrile – Santorini est unu paradisu de connòschere. Su colore biaitu de su chelu e de su mare e su biancu de is domos ant a aturare intre s'ànima tua. S'ìsula intrea difatis est una festa de colores! Su biàgiu a Santorini non depet èssere minispretziadu dae is prus giòvanos. A s'imbesse de comente si podet crèere, in cue sa bida noturna non mancat e non b'at bisòngiu de nàrrere chi s'intendet un'atmosfera màgica. In Santorini, comente in totu is ìsulas de sa Grètzia, ddoe at atratziones meda pro is giòvanos. Bolent bidos is areniles biancos, nieddos e rujos, sa Caldera, su faru de Akrotiri e sa crèsia de Santu Nikolaos, s'intrinada de incantu in Oia, e àteros ispantos de sa natura.

S'ispàssiu cumentzat a merie cun sa mùsica in is plàjas de Perivolos, in su Jojo beach club e in su Chili. In custu club organizant eventos fitianos cun ballos e mùsica chi cumentzant a is 17:00 e agabbant a mesa note. Però si seis chirchende sa bida noturna bera bos cussigiamus de andare a Thira, in ue podeis seberare intre unu nùmeru mannu de disco-pub e bos ais a ispassiare pro totu sa note, cumentzende dae sa una-sa una e mesa. Unu consìgiu? Si bos agradat a ballare note-note, ammentade·bos is nùmenes de custos locales famados: Town club, Two Brothers, Tropical, Higlanders, Enigma e su Koo club, s'ùnica discoteca de Santorini chi at una pista de ballu in foras e una in intro e in ue sa mùsica sonat finas a is ses de mangianu!

In s'ìsula grega ddoe at logos medas de bìdere, fintzas pro chie est chirchende una vacàntzia pro connòschere s'istòria, sa cultura e s'archeologia: difatis nche at giassos archeològicos de importu mannu comente Thira, Akrotiri e Mesa Vouno.

Si bos praghent is aventuras, girare Santorini est un'ispàssiu a beru. S'ìsula oferit unu servìtziu de postales dae Thira a Kamari, Imerovigli, Oia, Perissa, Akrotira, Monolithos, Vlihada, Baxedes, a s'aeroportu e a su portu Athinios. S'ìsula però si podet girare fintzas a pee, cun percursos panoràmicos meravigiosos.

Carta de identidade de su logu

E sa coghina? Bona meda e a prètziu baratu. Bos cussigiamus de tastare is licàntzias de su logu: insalada grega, moussaka, souvlaki, gyros, dolmades e unu durche traditzionale cun su mele, su baklava.

Carta de identidade de su logu