Unu biàgiu giòvanu e coloradu in su mundu de "Lucca Comics & Games"

(IlMinuto) - Casteddu, 12 de abrile - Lucca tzitade de sa Toscana e capitale de is fumetos. Lucca est su logu de "Lucca Comics & Games", una festa manna pro is istimadores de is fumetos.

Unu biàgiu a Lucca est unu biàgiu coloradu chi praghet meda a is giòvanos.

Dae sa Sardigna a Lucca si podet lòmpere cun fatzilidade dae s'aeroportu de Firentze o de Pisa. Dae sa tzitade de Pisa a Lucca si lompet in 20 minutos de trenu. Dae s'istatzione de Santa Maria Novella de Firentze a Lucca sunt un'ora e 20 minutos de biàgiu. S'istatzione de Lucca s'agatat in pratza Ricasoli, dae inoghe a su tzentru istòricu de sa tzitade, coro de "Lucca Comics & Games", sunt chimbe minutos de caminada. Si podet lòmpere a Lucca dae Firentze e dae Pisa fintzas cun su postale.

Ma faeddamus de Lucca Comics. Cantos sunt is giòvanos chi istimant is fumetos? De seguru sunt medas, comente sunt istados medas a leare parte a s'editzione 2013 de " Lucca Comics & Games", su Festival internatzionale de is giornaleddos de fumetos, de is giogos e de is illustratziones chi nche fiat in Lucca dae su 31 de ladàmine a su 3 de onniasantu de s'annu coladu. Is organizadores ant faeddadu de 217.646 presèntzias in totu, e su prus de custos, si cumprendet, fiant giòvanos.

In is pàginas de su giassu ìnternet de sa manifestatzione sunt giai annuntziende is novidades mannas chi ddoe ant a èssere in s'editzione 2014, chi la diant dèpere fàghere dae su 31 de ladàmine a su 2 de onniasantu e chi at a èssere rica meda.In su Festival internatzionale de is giornaleddos de fumetos, de is giogos e de is illustratziones ddoe at atratziones meda pro is giòvanos e màndigos bellos meda. Su tzentru istòricu est prenu de ristorantes de coghina tìpica. De tastare: su castagnaccio e su buccellato.

De una cosa semus seguros: " Lucca Comics & Games" in is annos at fatu connòschere e apretziare su nùmene suo. In is bator dies de sa manifestatzione is carreras de sa tzitade toscana si prenant a isticu de giòvanos "de totu is colores". Totu sunt ligados dae un'amore ebbia, s'amore pro su mundu de sos fumetos.

"Lucca Comics & Games" est una rassigna chi cussigiamus a totu is amantiosos de fumetos e illustratziones. Difatis chie at partetzipadu a is bator dies de su festival est ghiradu ammaghiadu e prontu pro nche torrare a andare annoas.

Carta de identidade de su logu