Biàgiu culturale a Bilbao

(IlMinuto) – Casteddu, su 7 de làmpadas - Is Terras Bascas sunt unu logu chi cussigiamus pro is vacàntzias de is pitzocos chi si bolent pasare dae s'istùdiu o dae su traballu. Difatis is Terras Bascas bogant un'àera de istòria e de cultura in ogni cosa chi addobiais.

Tastare pintxos e binos istraordinàrios, praticare totu is tipos de isport (surf, tziclismu, trekking, canotàgiu), leare parte a is eventos culturales, intrare in cuntatu cun sa natura: in cue is possibilidades non finint mai.

Bene bènnidu a Bilbao, Bilbo in limba Basca, capitale de sa provìntzia de Biscàglia e tzitade prus manna de is Terras Bascas.

Bilbo est una tzitade chi mudat de continu, chi gràtzias a una bògia manna de fàghere cultura, in pagos annos est resèssida a annoare s'immàgine sua de tzentru industriale pagu gratziosu. Unu traballu pro modernizare e dare una bida noa a sa tzitade chi est cumentzadu in s'agabbu de is annos setanta e oe at comente sìmbolu su museu Guggenheim (Abandoibarra Etorbidea), chi est s'atratzione prus de importu de Bilbao e unu de is edifìtzios prus famados in su mundu! Ma custu museu no est s'ùnica resone pro bìdere sa tzitade basca. Bilbo at àteras cosas medas de bos propònnere e su "new-look" suo no at cuadu sa memòria istòrica de su logu, ma antzis l'at valorizada.

Dae su tzentru istòricu galanu, su Casco Viejo (Nueva Plaza), cun su imbòligu de gùturos prenos de tzilleris in ue podes papare is pintxos, a is fràigos prus modernos comente su ponte biancu de Zubizuri (Paseo Campo de Volantín) o su palatzu Alhóndiga (Arriquibar Pratza), sunt medas is cosas chi podes bìdere e fàghere in su tempus de unu fine chida in Bilbao.

Girende in is carreras de su tzentru o passigende acanta de su riu Nerviòn podes agatare una fila de palatzos ispantosos progetados dae architetos internatzionales de importu.

Una de is zonas prus bias de sa tzitade betza est sa chi est a curtzu a su ponte de la Mercede (Barrio Abandoibarra), in ue b'aiat unu cumbentu chi como est sa sede de Bilborock, unu logu impreadu pro fàghere cuntzertos e eventos musicales frecuentados meda dae is giòvanos.

Immoe bos cussigiamus duos itineràrios: s'itineràriu istòricu e s'itineràriu de s'edade contemporànea.

Itineràriu istòricu

Su coro de custu itineràriu est Plaza Nueva, in ue si lompet a pee si semus in su tzentru istòricu o cun is trasportos pùblicos si semus a tretu mannu dae su logu. A curtzu dae custa pratza s'agatant ristorantes e locales caraterìsticos. Dae Plaza Nueva si lompet cun fatzilidade a su Teatru Arriaga arribende a Calle Viuda de Epalza, cara sud ovest pro pagos metros. Caminende in s'oru de su riu Nervión a bia nord s'agatat Palatzu Ayuntamiento. Pro lòmpere a Palatzu Diputacion Foral si podet giumpare su Puente del Ayuntamiento, a pustis sighire a caminare in Calle Buenos Aires fintzas a Biribila Plaza. Dae in cue Gran Via portat a su Palatzu Diputacion Foral. Caminende galu si lompet a sa Turre Iberdrola. Inoghe si biet su cuntrastu intre su "betzu" e su benidore de Bilbo.

Itineràriu de s'edade contemporànea

Partende dae su Parcu Etxebarria, a est de su tzentru istòricu, sìmbulu de su cambiamentu de sa tzitade, si lompet a s'àteru parcu mannu de Bilbao: Parcu Casilda Iturrizar. Pro arribare inoghe bos sugerimus unu caminu chi tocat àteros logos caraterìsticos de sa tzitade basca, comente atraessare su Paseo Campo de Volantin fintzas a addobiare su ponte progetadu de Santiago Calatrava, su Zubizuri. Su ponte portat a su Paseo de Uribitarte. Andende a nord, e caminende oru a su riu Nervión, si passat in dae in antis a su Museu Guggenheim. Sighende a caminare in Muelle de Evaristo Churruca, acanta de su Palatzu de is Cungressus e de sa Mùsica si biet su Parcu Casilda Iturrizar, su prus betzu de sa tzitade.

E pro mandigare? Depeis ischire ca sa calidade de sa coghina de Bilbo est ùnica. Pro custu bos cussigiamus de tastare: su bacalao al pil-pil, sa bacaloa a la vizcaina, sa purrusalda e is kokotxas!

Carta de identidade de su logu